Jowai, Risaw 20
Ka jinglehniam Durga Puja ki riewngeit Pnar jong ka Maa Jayantee Mandir hapoh shnong Nartiang, West Jaiñtia Hills District ka la poi sha kaba kut ha ka 20 tarik Risaw haba da ki spah ngut ki riewngeit Hindu kynthup na Shillong bad Assam ki la wan ïashim bynta da ka jingshitrhem.
Kane ka lehniam Durga Puja ka sdang na Mandir ha kaba u Pandit u Oni Maskut Deshmukh u la rah marwei ïa ka blei Durga kaba la shna ha ka dur jong ka pashor kait naduh na Mandir shaduh wah Myntang ha jingsynran lang u Dolloi, ki pator, ki lyngdoh bad katto katne ngut ki riewngeit Hindu lait noh ki kynthei.
Ha kane ka sngi la pyndep ruh ïa ka lehniam shad mastieh da u Dolloi ka Elaka Nartiang Salong Lamare ryngkat bad ki pator bad ki lyngdoh jong ka Elaka.
Hashwa ban pynngam um ïa ka blei Durga ka la don shwa ka jinglehniam harud katei ka wah kaba la kñia da u blang kynsai bad hadien katei la pyllait sa ïa ka paro.
Ka jinglehniam Puja ha Nartiang ka long kaba ïaid beit ïaid ryntih.
