Shillong, Risaw 20
U Nongïalam ka BJP bad ka MLA na Pynthor-umkhrah u Bah A.L Hek u la kyntu ïa u President ka UDP Bah Metbah Lyngdoh ba u dei ban ïai neh bad ka party bad ruh ban pynkhie im biang ïa ka, watla ka la don ka jingphet seng jong ki MLA jong ka.
Ka UDP ka la mad sa kawei ka jingshah ktah kaba jur hadien ba ki lai ngut ki MLA na ki saw ngut kiba dang sah, ki la leit ban pynïasoh noh bad ka NPP, kata tang hadien katto katne taïew ba ki phra ngut ki MLA ka UDP ki la rung sha ka BJP, kaba la pynlong mynta ïa u Bah Metbah Lyngdoh ban sah marwei kum u MLA ka UDP.
Haba kynthoh halor ka jinglong jingman, u Bah Hek u la ong, “Nga ïaroh ïa u. U ïeng halor ki nongrim lajong. U dei ban bteng ban ïaleh ban pynkhie im bad pynkhlaiñ ïa ka UDP.”
“Mynta baroh ki la ieh noh ïa ka UDP, hynrei nga kyrpad ïa baroh ki nongtrei ka party bad State President ban neh beit ha ka nongrim. Ka politik ka lah ban kylla ha kano-kano ka por,” u la bynrap.
Haba khot ïa u Bah Metbah kum u paralok ba bha, u Bah Hek u la ong, “Ngi la ïatreilang ryngkat mynta la bun-bun snem. Nga kwah ba un neh beit bad ka UDP. Ngim tip kaei ka ban sa jia, ka UDP ka lah ban nang ïoh shuh ki jingkyrshan ha ki sngi ban wan.”
“Nga ai ka jingkitbok kitrwiang ïa u Bah Metbah Lyngdoh u paralok jong nga. U dei ban ïeng kumba u la ïeng mynta,” u la ong.
Halor ka lynti ïaid jong ka UDP shakhmat, une u MLA ka Pynthorumkhrah u la ong, “Kata kan dei ka rukom treikam jong ka UDP bad ki nongïalam jong ka. Lada ki bujli ïa ka rukom treikam bad wanrah da ki nongïalam kiba tbit ban ïakhun ha ka ilekshon MLA ha u snem 2028 na ka tiket UDP, yn nym don kiba lah ban khang ïa ki.”
