Jowai, Risaw 20
Ki kshaid ki wah bad ki lum kiba don ha Jylla Meghalaya ki khring bha ïa ki nongwan shangkai pyrthei ym tang na Ri India hynrei na shabar ka Ri ruh kumjuh namar ki long kiba khuid bad kiba itynnad.
Hynrei ka long pat kaei kaei kaba sngewkhia namar ba don ki nongwan shangkai ki bym treh ban ïatreilang bad ki bor pynïaid jong ki jaka jngohkai namar ba ki kwah ban leh katba ki mon watla ka lah ban wanrah ïa ki sha ka jingmynsaw.
Ha kum kane kawei ka jingjia, uwei u nongwan shangkai na South India u la kynnoh ba u la shah leh donbor ha ka kynhun jong ki briew kiba don ha kshaid Phe Phe kaba ha ka shnong Skhenpyrsit, West Jaiñtia Hills District.
Kane kala paw pyrthei hadien ba la saphriang kawei ka Video ha ki rynsan Social Media ha ka step 20 tarik Risaw ba la upload da u Amalkrishna.
Katkum ka Video, utei u briew ryngkat bad 4 ngut ki paralok, u la kynnoh ba ka don ka kynhun ha katei ka jaka jngohkai kaba la dawa ban siew mar T.300 kum ka bai btin lynti ne Guide.
Katba ki dang ïaid lynti, u la kynnoh ba la don kawei pat ka kynhun kaba la phah ïa ki ban siew ïa ka bai rung kaba mar T.100 marwei, bad ynda la poi ha katei ka kshaid kila shah dawa sa mar T.100 na ka bynta ka bai ‘Life Jacket’ bad ong ba u kwah tang ban shong ha u maw, hynrei u la kynnoh ba katei ka kynhun kala ngiat pynban ïa ki.
Halor kane ka jingjia, haba ïoh ban ïakren bad u Ma Marbudki Phawa u nongpeit ïa ka Life Jacket, u la ong ba ki nongpeit ïa ka bai rung, kila pyntip ïa ki nongap kiba don ha kshaid, ban peit bha ïa kitei ki briew namar ba ki khlem kren wat tang shikyntien bad khlem siew eiei artad uwei napdeng jong ki u la buaid.
Haba kitei ki briew kila poi sha ka kshaid Phe Phe, u Ma Marbudki Phawa u la kren ïa ki halor ka jingbym ïalam Guide na ka bynta ka jingshngaiñ ka jong ki. Namar ka jingbym siew eiei, la phah noh ïa ki ban siew mar T.100 na ka bynta 5 ngut bad maki ruh kila siew.
U Ma Marbud u la pynshai ruh ïa ki, ba ki dei ban phong Life jacket lada ki kwah ban jngi ha ka dor kaba long 100 tyngka, bad u la ong ba hangta hi kitei ki briew kila ïaleh bunkam bad kyntait ban shim bai life jacket.
Uwei napdeng jong ki uba la buaid, u la law sopti bad thmu ban leit jngi ha ka bynta kaba la mana da ka dorbar shnong Skhenpyrsit namar ka jingkhlain bor palat jong ka um.
Marsien ïohi ïa ka jingthmu jngi jong utei u briew, u Ma Marbud u la ong ba u la sheptieng, ïoh ba jia kumno kumno ïa u, bad haba u la kren ïa utei u briew na ka bynta ka ‘life jacket’ utei u briew u la mai pynban ïa u, bad ong ba u nang ban hi jngi khlem da phong ka life jacket.
Hadien kane u Ma Marbud um banse, u la khot ïa ki paralok jong utei u briew ban tan ïa u sharud ka wah.
U Ma Marbud u la ong ba u khlem ktah kti eiei ïa utei u briew, hynrei u shu tan ïa u na ka bynta ka jingshngaiñ ka jong u hi.
Hadien kane, utei u briew u la pan noh ïa ka pisa kaba u la dep siew bad na ka liang ki nongpeit life jacket ruh kila pynphai ïa katei ka pisa bad kitei ki briew ruh kila mih noh na katei jaka.
