Shillong, Risaw 21
Ha kine ki sngi ba mynta, ka jingwan rung tuh ki suba Bangladeshi ka la jur bha ha ka Jylla, namar ka Jylla Meghalaya ka dei khappud bad ka ri Bangladesh.
Ïa kane ngi lah ban sakhi bad ïohi ïa ka jingïoh bat kaba la jan man ka sngi, da ki sengbhalang ka Jylla, ba ki suba Bangladeshi ki wan rung tuh sha ka Jylla, khlem da don ki kot jingpynshisha ba ki dei hok ki nongshong shnong ka ri India.
Ka Hynñiewtrep Youths’ Council (HYC), Umwai Unit ha ryngkat ki paidbah nongshong shnong, ha ka 20 tarik u Risaw 2026, ha ka por kumba 6:30 janmiet, ki la ïoh bat ïa u wei u briew na ka shnong Umwai, namar ka jingsuba ba u dei u nong Bangladesh bad ba u la rung tuh shapoh ka ri India. Ha ka por ba la tohkit ïa une u briew, la lap ba um dei satia u nong India, hynrei u lah wan rung tuh sha India.
Namarkata, ka HYC Umwai Unit ka la shim ïa ki sienjam kiba donkam bad hadien kata ka la aiti noh ïa une u briew sha ki bor pynïaid aiñ kiba dei khmih, khnang ba kin pynshisha ïa ka jinglong jong u, ka Ri aiu ba u wan kaba dei bad ban leh ïa kaba donkam katkum ka aiñ. Ka seng ka ngeit, ba ka jingpeitngor pyrshah ïa ki kam rung tuh sha ka Ri ka long kaba donkam, bad ka kyntu ïa ki bor ba dei khmih, ba kin tohkit bniah ïa kum kine ki jingjia bad ban shim ïa ki sienjam katkum ka aiñ lada lap ba la don ka jingpynkheiñ aiñ.
Ka seng ka kyntu ruh ïa ki paidbah, ban long kiba peitngor bha namar ka jingrung tuh jong ki nong Bangla kan ktah ïa ka shongsuk shongsaiñ jong ka Jylla bad ka Ri hi baroh kawei, lada ym tehlakam ïa ka.
