Shillong, Risaw 21
Ka nongbah Shillong ka la sakhi ïa ka jingshah thombor da ki jingkawang petrol bom kiba la jia ha ki lai tylli ki jaka ha ka sngi Ba-ar, kata ha ka thaiñ Kench’s Trace, Keating Road bad Laitumkhrah, ong ki pulit ha ka sngi Balang.
U Superintendent of Police (SP) ka East Khasi Hills Bah Vivek Syiem u la ïathuh sha ki lad pathai khubor ba kam shym la don satia kano-kano ka jingjulor ne jingmynsaw briew ha kine ki jingjia.
“Kine ki jingjia shah kawang petrol bom ki dei kiba la jia ha ka sngi Ba-ar ha ki lai tylli ki jaka, kawei ha Kench’s Trace, ha Keating Road bad ha Laitumkhrah, hynrei ym shym la don kano-kano ka jingjulor, ne jingmynsaw briew,” ong u SP.
U SP u la ïathuh ba ki pulit kila shim ïa ki lad jingïada ha kylleng ki jaka jong ka nongbah.
“Ki pulit kila shim ïa ki lad jingïada bad ngi la pynïeng ïa ki jaka talasi kali ha kylleng ki jaka ban tehlakam ïa ki riew runar na ka jingkawang petrol bom lane ban buh jingma ïano-ïano. Ngin sa nang pynjur ïa ka jingïaid pahara, pynjur ïa ka jingtalasi, ngin sa pynkhlaiñ ïa baroh ki kam jong ki pulit,” ong u SP.
“Ngi la dep ban register case ïa baroh kine ki jingjia bad ki jingtohkit kila ïaid shakhmat ban lah ban ithuh ïa ki briew kiba donkti bad ban leh katkum ki kyndon aiñ. Haduh mynta ym pat ïoh kem ïa ki runar,” u la ong bad bynrap ba ki pulit kila lum ïa ki video CCTV halor kine ki jingjia bad ka jingpynithuh ïa ki briew ba donkti kala ïaid shakhmat.
Haba jubab ïa ka jingkylli la ki don kino-kino ki kynhun kiba donkti ha lyndet kane ka jingthombor, u la ong, “Ïa mynta ym pat don ba kam donkti ha lyndet kine ki jingjia hynrei ngin sa khmih ïa baroh kine ki jingia bad nga tharai ba baroh ki pyni shai ïa kaei kaba jia hynrei, ka jingthmu baroh ha kane ka Puja ka la buh dak jingkylli.”
U la ong ba haduh mynta, la jia kumba 4 haduh 5 tylli ki jingjia kiba kum kine ha ka por jong ka Puja.
“Haduh mynta, la don kumba 4 haduh 5 tylli ki jingjia. Haduh mynta, ym pat don mano-mano ba kam, hynrei ngim lah ban kdew ïa kano-kano ka kynhun,” u la ong.
