Shillong, Risaw 21
Hadien kawei ka jingjia shah kawang petrol bomb ha ophis ka Directorate of Employment and Craftment Training, kaba don ha Keating Road, ha ki runar ki bym lah ban ithuh durkhmat, la lah ban sakhi biang halor kane ka kam kawang petrol bomb, ha kawei ka dukan kaba don ha ïew Laitumkhrah. Katkum ka jingïoh lum jingtip la ïathuh ba kane ka jingshah kawang petrol bomb ka lah ban dei ha ka por 1 baje eiei mynstep phyrngap, jong ka 21 tarik u Risaw 2026.
La ong ruh ba ym shym la lah ban ïohi ne ithuh ïa kita ki briew kiba donkti ban kawang petrol bomb ha katei ka dukan, bad la ïathuh ba lyngba ka jingïoh ringdur na ka kor CCTV, la don kawei ka scooty kaba ïaid lyngba katei ka dukan ha ki por 1 baje duna eiei.
Katkum ka jingïathuh ka trai ïing kaba sah ha lyndet katei hi ka dukan ha Laitumkhrah, ba ka la ïoh jingtip halor kane ha ki por 1:20 eiei mynstep, lyngba ka jingpyntip ki paidbah ba ka la don ka jingshah kawang petrol bomb ha ka dukan jong ka. Haba ïadei bad kane na ka liang ka trai dukan ka la ujor ejahar pyrshah ïa ki briew ba donkti ha Laitumkhrah PS.
