Shillong, Risaw 21
Ka jingdon mynsiem ki kynhun ban kner ki kti jingïarap sha ki briew kiba donkam shisha ka jingïarap ka pynlong ïa ki briew kiba don hapdeng ka jingeh jingjynjar kaba pynkmen bad ka ai mynsiem shi katdei ïa ki watla ki don hapdeng ka jingduna ka ïoh ka kot ha ka imlang ka sahlang.
Ka kynhun jong ki nongkhaïi jhur ba la tip kum ka Khasi Jaiñtia Food & Vegetables Supplier’s Association (KJFVSA), ha ka jingïatreilang ka Federation of Khasi Jaiñtia and Garo People (FKJGP), ka Hynñiewtrep National Youth Front (HNYF) ki la noh synñiang ban pynshna ïing sha kawei na ki riew kynthei ka Kong Sandra Khongstia ba shong ba sah ha ka shnong Wahkdait, Pynursla Civil Sub-Division.
Ka Kong Sandra ka dei kaba la shah ïeh khunswet, haba ka la ïoh la u tnga u ban long u nongri nongsumar pynban u la ïehnoh beiñ haba ka la ïoh saw ngut ki khun, man ka sngi ka im da kaba shu bylla sngi katba ïoh.
Ha kane 20 tarik u Risaw 2026 ba la aiti ïa ka ïing ïa ka Kong Sandra la donlang u Rangbah Shnong ka Shnong Wahkdait u Bah July Khongstia, u Bah Bristar Mawthoh President jong ka KJFVSA bad u ba long ruh kum u Agriculture Secretary ka FKJGP, na ka ïing ka sem la don lang u Bah Poli Khongstia bad kiwei-kiwei de.
Ka Kong Sandra trai jong ka ïing haba ai jingkren ha kane ka sngi ka la pynpaw ïa ka jingsngewkmen ba ka la ïoh ka ïing ba paka bad kaba bit ba biang ban sah, ha kajuh ka por ka la pynpaw ka jingsngewnguh ïa ki nongïalam ka KJFVSA, FKJGP bad HNYF kiba la shim ka jingkitkhlieh ha ka ban pyntyllun ïa ka kam ban pynïoh ïing ba paka ïa ka, ka la pynpaw ba kam ju poi pyrkhat ba kan ïoh ïa ka ïing kaba bit ba biang, namar ba ka dei tang ka nongbylla sngi.
Ki nongïalam kiba ai jingkren ha kane ka sngi ba kynthup u Bah Tyllibor Swer, General Secretary ka HNYF, u Bah Ferdinand Mawrie Environment Secretary ka FKJGP, u Bah Devinson Pyngrope Adviser jong ka KJFVSA bad u Bah Henry Dkhar Working President jong ka KJFVSA ki la ai ki kyntien kyrkhu kyrdoh ba kane ka longïing kan nangroi nangsan ha ki sngi ki por ban dang wan bad ban ri ban sumar kyndong ïa kaba kine ki lai seng ki la synñiang ha kane ka ïing ka sem.
