Shillong, Risaw 22
U MLA barim ka United Democratic Party (UDP), u Bah Paul Lyngdoh ha ka Sngi Balang u la batai ïa ka hukum beh seng ba la pynmih da u khlieh ka UDP, Bah Metbah Lyngdoh pyrshah ïa u lem bad 2 ngut kiwei pat ki MLA kum ka bym don jingmut bad ka bym shong nongrim.
Kumban shu kdew hangne, 11 ngut na ki 12 ngut ki MLA ka UDP ki la pynïasoh noh sha kiwei pat ki seng saiñ pyrthei – 8 ngut sha ka BJP, ïa kaba ïa ka jingpynïasoh jong ki la ithuh da u Lamphang ka Ïingdorbar Thawaiñ, bad 3 ngut kiwei pat bad ka National People’s Party (NPP) kaba don ha ka bor synshar – ha kaba ïa ka aplikeshon pynïasoh jong ki kaba la aiti ha ka 19 tarik u Risaw, ka dang ap ïa ka jingithuh na u Lamphang.
Ki 3 ngut ki MLA kiba la pynïasoh bad ka NPP – Bah Paul Lyngdoh (West Shillong), Bah Renikton Lyngdoh Tongkhar (Mawkyrwat) bad Bah Nujorki Sungoh (Mookaïaw), ki la shah beh seng noh hadien kane.
Haba ïadei bad kane, u Bah Paul u la ong, “Kam long kaba donkam ban kren eiei. Ka jingsngew jong nga ka long ba kam long kaba donkam ban kren eiei. Phi kwah ïa ka jingsngew jong nga, kata ka dei ka jingsngew.”
U la kdew ba ka UDP ka la pynmih ïa ka hukum beh seng hadien ba ki 3 ngut ki MLA ki la dep ban aiti ïa ka aplikeshon pynïasoh jong ki sha u Lamphang.
“Ka long kum ba phi sympat ïa u kulai uba la ïap. U kulai u la ïap lypa bad phi ïai sympat ïa u,” u la ong haba kylli la hato ka jingshah beh seng kan ktah ne em ïa ka jingpynïasoh.
La hato ka dei ka jingleh ka bym don jingmut na ka liang ka UDP, u la ong, “Hooid, ka dei ka jingleh ka bym don jingmut.”
