Shillong, Risaw 22
Ki nongïalam ka Joint Action Committee Against Ropeway Project, ha ka sngi Palei ki la mih jyndat na ka jingïalang ba la khot da ka Sorkar Jylla haba ïadei bad ka jingshna ‘Ropeway’ ha u Lum Shyllong.
Kane ka jingleit shimbynta jong ki, ka dei hadien ba la don ka jingkhot na ka liang ka tnad Jngohkai ban ïadonbynta lang ha katei ka jingïalang.
Ka mat ïakren ha kane ka sngi, kadei ban pynshai haba ïadei bad ka jingpyrshah ban shna ïa ka ‘Ropeway’ ha u Lum Shyllong.
Haba ïaid ka jingïalang, na ka liang u Bah C.V.D. Diengdoh, uba dei u Director jong ka Ropeway Project, u la ai ka jingpynshai halor ka Public Hearing katei ka projek, ki longkmie na ka JAC ki la ïeng bad buh ki jingkylli, bad namar ka jingbym ïoh ka jubab kaba shai, baroh ki longkmie ba pyrshah ki la mih jyndat na katei ka jingïalang.
Ka jingïalang hapdeng ki nongïalam shnong, ki dkhot jong ka JAC bad ka Sorkar halor ka Projek Ropeway ka la kut khlem jingïasngewthuh jingmut, hadien ba ki dkhot ka JAC ki la mih jyndat na ka jingïalang bad dawa ban pynsangeh noh ïa katei ka projek.
Ha kane ka jingïalang, u Bah C.V.D. Diengdoh, uba dei u Director jong ka Ropeway Project, u la pynshai ïa ki nongïalam shnong bad ki dkhot ka JAC halor katei ka projek, kynthup ïa ka rukom ban pynïaid bad buh ïa ki tower. U la pynshai ruh halor ki sienjam ban shim khnang ba ka jingpyntreikam ïa ka projek kan ym ktah ïano-ïano.
Na ka liang ki nongïalam shnong, ki la pynpaw ba lada ka JAC ka kwah ban pynlong biang ïa ka Public Hearing halor kane ka projek, ki long kiba kloi ban ïatreilang ban pynlong biang ïa kata ka jingïalang paidbah.
Hynrei, ki dkhot ka JAC kim shym la pdiang ïa kane ka jingtyrwa bad ki la mih jyndat na ka jingïalang, da kaba pynneh ïa ka jingdawa jong ki, ban pynsangeh noh ïa katei ka projek mardor.
Kane ka jingïalang ka la pyni ïa ka jingïapher jingmut kaba dang don hapdeng ka JAC bad ki nongïalam shnong halor ka jingpyntreikam ïa katei ka projek.
