Shillong, Risaw 22
Haba buh noh shadien ïa ka jingpynphriang ban don ka jingbujli Myntri, u Symbud Myntri Rang-bah ka Jylla bad Presi-dent ka NPP Meghalaya u Bah Prestone Tynsong ha ka sngi Palei u la ong ba kam shym la don satia kano-kano ka jingbuh kyndon na ka bynta ki lai ngut ki MLA ka UDP ba la pynïasoh NPP dang shen bad ruh ba kane ka Kynhun Myntri kaba mynta ka la don lypa ïa la ka jong ka kam.
Haba kylli bniah hato uwei napdeng ki lai ngut ki MLA barim ka UDP, yn pynrung hapoh ka Kynhun Myntri, u Bah Prestone u la ong, “Ha ka Kynhun Myntri la don lypa hangto, ki la don la ki jong ki kamram.”
Halor ka jingdon ki khubor ba kam ba u Bah Paul Lyngdoh un shah pynrung hapoh ka Kynhun Myntri, u Bah Prestone u la ong, “Ka long kumta, ngam don jingtip eiei. Nga kwah ban tip na phi, ïathuh maphi ïa nga. Nga dei u Symbud Myntri Rang-bah hynrei ngam don jingtip eiei halor kata. Nga tharai ba nga tip na phi mynta, kumta hato phi lah ban ïathuh ïa nga mano ba ïathuh ïa phi kumta. Nga kylli na phi namar nga ruh ngam don jingtip eiei.”
U la kyntait ruh ban don jingpynbor eiei na ka BJP ban ai bhah shuh ha ka kynhun Myntri hadien ba ki phra ngut ki MLA barim ka UDP ki la pynïasoh sha ka BJP.
“Kam don eiei haduh mynta kaba kum kata,” u la ong.
Hato la ka don kano-kano ka jingkular kaba la ai sha ki lai ngut ki MLA kiba la kynthih na ka UDP sha ka NPP, u Bah Prestone u la pynshai, “Kumba ka long haduh mynta kam shym la don satia kano-kano ka jingbuh kyndon lypa na ka bynta ki lai ngut ki MLA kiba la rung sha ka NPP na ka UDP.”
“Nga kwah ba kum u State President jong ka NPP ban ïakynduh ïa baroh ki nongïalam ym tang na ki district hynrei wat na ki konstitwensi bad ki shnong ruh kumjuh. Mynta ka sngi, nga la pynlut bun ki kynta ban ïakynduh ïa ki nongïalam ban ïakren halor ka jingpynkhreh kaba ngi la ïaid bad kumno ban long kiba la khreh ban leit sha ka ilekshon shiteng samoi, kaba la dei ban long noh shen,” u la ong.
