Shillong, Risaw 22
Ki pulit Meghalaya ki la pan shuh ïa ki bor pahara ka Sorkar Pdeng hadien ba ka la don ka jingkawang ‘Petrol Bomb’ ïa ka ophis jong ka Enforcement Directorate ha Shyiap ha ka step Sngi Palei, kaba dei ruh ka sien kaba saw kaba kum kane ka jingjia ha sor Shillong kaba la jia ha kine ki 48 kynta ba la dep.
Katkum ka jingïathuh jong ki pulit, la ong ba ïa utei u ‘Petrol Bomb’ la kawang da ki runar ha ka ophis jong ka ED bad u la hap ha ki mawkyndon kiba leit sha katei ka ophis. Ym shym la don mano-mano ruh ba mynsaw, watla ki jingkhang-ïit ki la shah pynjulor.
Ka nongbah ka la sakhi ïa kiba bun ki jingjia kawang ‘Petrol Bomb’, naduh ka Sngi Ba-ar, kiba kynthup ha Kench’s Trace, Keating Road bad Laitumkhrah.
Haba kren sha ki lad pathai khubor, u Superintendent of Police (City), u Bah Dangsan Khyriem u la kubur ba kitei ki jingjia ki la jia wat hapdeng ba la pynjur ïa ka jingkhynra bad jingtalasi.
“Watla ki ‘Naka’ jong ngi bad ki jingpahara da ki kali bad kjat kumjuh la pynlong man ka sngi ha baroh ki jaka kiba hap hapoh sor Shillong bad shabar ka sor Shillong, ka la don ka jingshah kawang ‘Petrol Bomb’ kumjuh hynnin ka sngi ha Langkyrding hynrei kam shym la don kano-kano ka jingjulor,” u la ong.
Haba pynskhem ba ka jingpahara kan nang jur shuh-shuh, u la ong, “Ngin bteng ïa ki ‘Naka’ jong ngi, ngin pynbun ïa ki ‘Naka’ jong ngi bad ngi la pan ruh ïa ki bor pahara na ka Sorkar Pdeng naduh mynta ka sngi, bad ngin sa ïoh ïa ki ha ki khyndiat sngi ban wan, hynrei wat hapdeng kata, ngi kwah ban pyntikna ba ki paidbah kin long kiba shngaiñ bad ba ka jinglong-jingman kan long kaba suk ba saiñ.”
Halor ka jinglong-jingman jong ka jingtohkit, u Bah Khyriem u la ong, “Ngi dang wad ïa ki runar kiba donkti ha kine ki kam kawang ‘Petrol Bomb’.”
Haba kylli katno pyrton ki pulit Sorkar Pdeng la pan, u la ong, “Ngi dang thoh mynta ka sngi bad ngin sa peit katno ngin ïoh.”
U SP u la ong ruh ba ym pat lah ban pyntikna ïa ka jingthmu ba sha lyndet haba ïadei bad kine ki jingjia.
“Ngim pat ithuh ïa kano-kano ka bynta haduh mynta, hynrei kane ka dei beit ka kam jong ki katto-katne ki runar kiba pyrshang ban shim ïa ka aiñ ha ki kti lajong bad ban pynthut ruh ïa ka jinglong-jingman ka shong suk shong shngaiñ ha sor. Kumta ngi dang trei shitom bad bishar bniah ïa man la ki dur-khih bad man la ki dak ba lapdien bad ki sabut ba ngi ïoh, ngi kyrmen ba ngin lah seisoh haba ïadei bad baroh kine ki jingjia,” u la ong.
Na ka liang ki pulit, ki la pynngat mukotduma bad ki dang khmih bniah ïa ki dur-khih CCTV bad kiwei-kiwei ki sabut.
