B.M. LANONG
Ha sor eh ban pyndait-pynpur ïa kita ki lynti-suiñ sainar (Ropeway) te, ynda la pyrkhat bha, kan wanrah shisha bun ki jingeh, khamtam ïa ka shnong Madan Laban bad ïa kiwei ki shnong ba marjan ruh, kum ka Lumparing kaba don ha syndah. Ka jingjulor ka mariang pat, kan ktah lang ïa baroh.
Ki jingsniew kiban mih na kane kin bun bha; kaba palat eh kan long ka jingktah ïa ki khlaw ha thaiñ Lum Shyllong hi, kaba dei ka tyllong um dih jong ka sor Shillong, da ka jingkiew jinghiar ki kali bad ki paidbah jngohkai pyrthei (tourists) kiban pynma ïa ki khlaw Lum Shyllong ha ki rukom bapher-bapher.
Ki khlaw ba rben kin sa nang stang iar da ka jingïarung-ïamih ki paid shong Ropeway; ki jaboh-jabaiñ babun rukom, kin pynlong pom ïa ka mariang jyrngam-barben bad ka jingïaboi ki nongleit-nongwan sha Lum Shyllong, kan sa knieh noh ïa ka jingsotti hin-ly-hin ka mariang.
Bun ki nongtrei ka Forest Department, ki pynpaw ïa ka jinglyngngoh halor kane ka kam, namar ka long kumba ai da ka kti kamon, knieh noh pat da ka kti kadiang. Ka pyrkhat pyrdain ki nongsynshar ka kdew ïa kane ka jingshisha.
Ñiuma, ka Sorkar ka la dep kohnguh bad aibor (approved), hynrei haba ïohi ba ki don jingshisha ha ka jingkdew kiba pyrshah ïa kane ka bynta, balei ki nongsynshar Sorkar kim bishar bha, la ka shongnia ne em ka jingpyni jong kito kiba pyrshah, ym dei kein ban shu jubab mynthi ba la dep rai la slem. Lah ban ‘review’ ïa kano-kano ka rai haba don ki daw ba shongnia.
Kawei pat ka bynta ba kongsan kaba ïadei bad ka jingma jong ka Ri India, ba ka tnad India Air Force ruh ka don hajan?
Kumno Lada Hiar Noh Ha Garisson Ground?
Namar ba ki nongshong shnong Madan Laban bad kiba marjan ruh kim ïahap jingmut ban pynlong jaka hiar ha Madan Laban, balei ka Sorkar kam pynkynriah noh sha Madan Kyrkit Laban, ka madan kaba ju pynlong ha ki por Sorkar Assam, wat ïa ki Inter District Football jong baroh ki District ka Assam Baiar jong kitei ki snem (Undivided Assam)? Ym dei tang ka Inter District Football kaba ju long manla u snem, hynrei bun kiwei-kiwei ki jait jingïalehkai ruh, ju pynlong ha kane ka Madan Kyrkit Laban, kynthup ïa ka Annual Shillong Athletic Meet.
Nga kynmaw ba arngut ki samla kynthei Laban kiba ju paw bha jong kitei ki por (1960 khlieh) ïa kiba ju pynbna kyrteng ruh da ki tyndong sawa (Loud speaker) jong ki nongpynïaid, ki long i Kong Sukmon Nongkhlaw na Laban bad i Kong Roma Sing Nongpiur na Lumparing, baroh arngut kiba dang shait dang khlaiñ bha haduh mynta, na kane ka daw, kum ki nongïalehkai kiba sumar met.
Ñiuma, don kiba kdew ruh ba ka Madan Kyrkit Laban ka la dei ka jong ki shipai, kumta kan ym lah long. Balei kam lah long? La aiti sha ki shipai da ka Sorkar Assam, ai ba ka Sorkar Meghalaya lajong kan pan kylla noh haba mih kum kine ki jingdonkam, khamtam ba ki shipai kim ju kham pyndonkam ïa kane ka madan. Lada shimti noh da ka Sorkar Meghalaya, ai kein ba ki shipai ruh kin pyndonkam lang da ka jingïapynbeit, haba don kino-kino ki por ba donkam ha kane ka Madan.
Kumno Pat Lada Rah Sha Lum Sohpet Bneng?
Lada ym don jingwit- jingeh ei-ei, te rah noh ïa kane ka Ropeway sha u Lum Sohpet Bneng ba kylluid ka Mariang, lada ym don kano-kano ka jingwit. U Lum Sohpet Bneng u don la kajong ka khana bad ka mariang kaba kylluid, kaba ïakiew-ïahiar bha ki nongleit kai pyngngad. Ka Tourism Department jong ka Sorkar ka lah ban pynshai halor kane ka kam, namar ïa ka Ropeway kaba thmu mynta ha Lum Shyllong ruh dei kane hi ka Department kaba don bynta. Lada ym long hangne ruh, ym pher, tangba lait noh hapoh shnong Madan Laban, lane ha kino-kino ki shnong ba ïabun briew bad ki ïing ki sem, kiba don hapoh Municipal.
