Shillong, Risaw 22
Kiba shongdie madan ha shilynter ka surok GS Road na Motphran bad ha ki thaiñ Ïewmawlong ki la ong ba lada ka Sorkar ka lah ban weng ïa ki briew ba sah be-aiñ ha Lum Survey bad ban ai ïa katei ka jaka ïa ki ban shongdie jingdie ki kloi ban pdiang.
Myn ha ka 16 tarik u Risaw 2026 ka Shillong Municipal Board (SMB) ka la pynmih ïa ka jingthoh kaba ong ba naduh ka 25 tarik u Naiwieng 2026 ki rud surok ka GS Road na Motphran bad ki thaiñ Ïewmawlong yn pynbna noh kum ki “No Vending Zone” da ka kdew ruh ba kane kan ïarap ban pynduna ka jingdheng kali ha surok.
Haba u nonglum khubor U Nongsaiñ Hima u leit ban ïakren ïa ki katto katne ngut ki longkmie ba shongdie jingdie ki la pynpaw ba kin ym pyrshah ïa ka jingpynkynriah na ka jaka ba ki shong, hynrei ki ong pat ba ka Sorkar ka dei ban pynbiang ïa ka jaka ba ïahap ba kin shong die jingdie.
Ki don ki longkmie kiba pynpaw ba ki la shong dukan da ki phew snem ha kitei ki rud surok bad pynpaw ka jingsngewkhia haba ïadei ka jingpynbna ba kyndit ka Sorkar ba kin hap kynriah ha ka mala ba shapoh ka jaka pynïeng kali ba don ha Ïewmawlong.
Ka Kong Aidoris Warjri kaba shong die jaiñ, ka la ong, “Weng ïa ki briew ba sah be-aiñ ha Lum Survey, ai jaka ïa ngi ban shongdie jingdie ngi kloi ban pdiang, ngim lah ban pdiang ban rah ïa ngi sha kiwei ki jaka” ka la bynrap ruh ba ka Lum Survey ka dei ka jaka ba la jyllei ki kam sniew ba laiphew jait bad kynnoh ba ka Sorkar kam ïohi ïa kita. “Weng ïa ki jingsniew pynneh ïa kiba bha” ka la ong.
Shuh-shuh ka Kong Matilda Lyngdoh ka la ong ba ki dawa ïa ka Sorkar ban ai ïa ka jaka kaba hajan na ka jaka ba ki shong mynta bad ki long kiba kloi ban ïatreilang ïa ka jingthmu ka Sorkar.
Ban shu kdew ha ka 21 tarik Risaw ki nongshong die madan ki la don ka jingïalang ban ïakren halor kane ka jingpynbna ka SMB ha kaba ki la shim ruh da kawei ka rai ban dawa ïa ka Sorkar ban pynduh pyndam ïa katei ka jingpynbna hapoh shiphew sngi.
