Shillong, Risaw 22
Haba pynpaw ïa ka jingkyrshan ïa ki nonghi-kai deficit kiba la ïakhih, ka Voice of the People Party (VPP) ka la ong ba ka jingïakhih ka pynpaw ïa ka jingbym shimkhia ïa ki hok jong ki nonghikai bad ka la dawa ïa ka Sorkar ban shim ki sienjam ha ka por ba la buh.
Ha ka kyrwoh ba la phah ha ka sngi Palei jong ka taïew, u President ka VPP u Bah Ardent Miller Basaiaw-moit u la ong, “Ka VPP, ka ai jingkyrshan kaba pura ïa ki nonghikai deficit ka Jylla Megha-laya, ha ka jingïakhun jong ki ban ïoh ïa ka hok, ka burom bad ka jingïada ïa ka hok ba kidei hok ban ïoh”.
“Ka jingïakhih kaba dang shen jong ki nonghikai deficit ka long ka jingkynmaw bad ka jingsngewsih kaba nang jur hapoh ka imlang sahlang na ka bynta ki nonghikai halor ki jingeh kiba ïadei bad ka jingshakri jong ki, ki bym pat lah ban pynbeit haduh mynta,’ ong u Bah Ardent.
Haba pynrem ïa ka jinglong jingman ha kaba ki nonghikai ki hap ban mih ban ïakhih, ka seng ka la ong, “ka long kaba sngewsih haduh katta-katta ba ki nonghikai, kiba aiti ïa la ka jong ka jingim ban saiñdur ïa ka lawei jong ki khun jong ngi, ki shah pynbor ban ïakhih, halor ka jingsngap mynthi ka Sorkar.”
Katkum ka jingong ka VPP, ki mat ba kongsan ka CPF, ki jingsiew ba sahteng jong ka DA arrear, jingïoh jingmyntoi haba la shongthait, ki la sahkut namar ka jingbym shimkhia ka Sorkar.
“Ki jingdawa jong ki ha kaba ïadei bad ka CPF, ki jingsiew ba sahteng ka DA, ki jingïoh jingmyntoi haba la shongthait bad kiwei-kiwei ki kam shakri, ki nonghikai kidei hok ban ïoh,” ong ka VPP.
Ha ka jingkren ba pynpaw pyrshah ïa ki bor synshar, ka VPP ka ong, “Ngi pynrem jur ïa ka jingleh riewkhlaw ki nongsynshar bad ka jingbym shimkhia na ka bynta ki nonghikai”.
“Ki IAS ki dei ban shakri ïa ki paidbah, ym ban pyrkhat tang ïa kito kiba la shaniah ha ki ban shakri ïa ka kam,” la ong ka VPP bad bynrap, “Ym don uwei ruh u ophisar, khlem da kheiñ ïa ka kyrdan, uba kheiñ ïa ki nonghikai kiba kham poh lane ban kyntait ïa ki jingeh ba ki dei hok ban ïoh, tang namar ba kim don ha ka bor.”
Haba pynksan ïa ka bynta jong ki nonghikai, ka VPP ka la ong, ‘Ki nonghikai ki dei ka lawei ha ka imlang sahlang. Ka Sorkar ka bym burom ïa ki nonghikai, kam sngewthuh ïa ka dor ba shisha ha ka jingpule.”
Ka VPP ka la khot ïa ka Sorkar Jylla ban pynlong ka jingïakren kaba don jingmut bad ki nonghikai.
“Ka VPP ka kyrpad ïa ka Sorkar Jylla, ba kan ïatreilang bad ki nonghikai bad ban pynbeit ïa ki jingdawa, kiba dang sahteng khlem da pynslem shuh,” la ong u Bah Ardent.
“Ki nonghikai ki dei hok ban ïoh. Ka VPP ka ïeng skhem bad ki nonghikai deficit ha ka jingïaleh jong ki na ka bynta ka burom bad ka hok,” la bynrap shuh shuh ka kyrwoh.
