Shillong, Risaw 22
Ka Hynñiewtrep Youths Council (HYC) ka la pynrem jur ïa ka Sorkar Jylla halor ka jingpyndonkam ïa ar tylli ki buit bad ka jingkhuid jingsuba ha ka rukom treikam bad ha ka jingkheiñ jingdiah.
Ha ka kyrwoh ba la phah da u Bah Roy Kupar Synrem, President ka HYC u la ong “Ki jubab ka RTI ki la pynpaw ba ka ophis u Commissioner of Excise, ka la kyntait ban pyni ïa ka jingpynlut jong ka tnad ha ka kam mukotduma kaba don bynta lang u Amit Kumar, da kaba kdew ïa ka Section 8 jong ka RTI Act, katba ka Meghalaya Tourism Development Corporation ka la long kaba kloi bad ka la pynbiang ïa baroh ki jingtip ha kaba ïadei bad ki jingsiew kiba ïadei bad ki bai mukotduma baroh shi snem sha u nongaibuit ha ka liang aiñ, kaba kynthup lang ïa u nongïasaid aiñ uba napoh ka Jylla”
“Balei ka jingkhuid jingsuba bad ka jingai jingkheiñ ka la long kaba lah tang na ka bynta uwei u nongïasaid aiñ hynrei ka la kylla long pat ka lad ban ïada ha ka ban ai jingtip haba ka kynthup ïa u Advocate General u Amit Kumar?” la buh jingkylli ka HYC.
“Hato kane ka Sorkar ka pyndonkam ïa ki kyndon aiñ ki bapher-bapher na ka bynta ki nongïasaid aiñ ki bapher bapher” ka la kylli shuh shuh.
“Haba da ki klur tyngka la pynlut ïa ka pisa paidbah, ki nongshong shnong ki don hok ban ïoh ïa ka jubab, ym tang ban shu jied ban ai ïa ki jingtip bad ki kyndon aiñ kiba la pyndonkam ban khanglad ïa ki jingkylli kiba shong aiñ” la pynpaw ha ka kyrwoh.
Ka HYC ka la dawa ba dei ban ai ïa ki jingtip kiba pura, ka la bynrap “Ka Sorkar ka dei ban pynshai ïa kane ka rukom treikam bad dei ban pynbna paidbah ïa katei ka jingpynlut jingpynsep, da kaba ïaid katkum ki kyndon jong ka aiñ”.
