Shillong, Risaw 23
U Bah Olan Sing Suiñ, MLA ka Mawsynram Konstitwensi uba dang shu pynïasoh shen bad ka Bharatiya Janata Party (BJP), u la ong ba ka jingrung jong u bad ki 7 ngut ki MLA sha ka BJP, ka dei ban suk lada ïakren na ka bynta ka roi ka par ha ka Jylla.
“Mynta ka BJP kaba synshar ïa ka ri India bad lada dei kajuh ka party kaba synshar ha ka Jylla, kane kan suk palat ban ïakren haba ïadei bad ka roi ka par,” la ong u Bah Olan haba ïakren bad u Nongsaiñ Hima ha ka sngi Thohdieng jong ka taïew.
“Haba ka BJP ka dei kaba synshar ha bun tylli ki Jylla ha ka ri India bad balei ki paidbah kim ailad ïa ka BJP ha Meghalaya ban synshar. Ki paidbah ki dei ban ai lad ïa kane ka party kaba la ai ïa ka synshar kaba biang bha ha ka Ri baroh kawei,” u la ong.
U Bah Olan Sing Suiñ u la kdew ruh ba kane ka party ka kular ban pynïoh ïa ki jingdawa kiba la buh hakhmat eh na ka bynta ka Jylla, da kaba bynrap ba ka BJP ka la dep kular ruh ba ïa kine ki mat jingdawa, yn sa pynurlong ha ka por kaba biang.
Haba kylli u ong “Ngi la don bad ka BJP, ngi shaniah beit ban ïoh ïa kine ki mat jingdawa”.
Haba ïadei bad ka jingkren jong kiba bun ki paidbah, ba ka BJP ka dei ka party kaba pyrshah Khristan, na ka liang u Bah Olan u la buh jingkylli “Hato ka la don kata ka jingpyrshah Khristan naduh ba synshar ka BJP la kumba 15 snem mynta”?.
U la ai ka nuksa, ba ha ka por ba pynlong rally ka KSU, ki la don ki briew ba pynthohbria ïa ka seng, te kane ruh ka dei kumjuh ïa ka BJP ba ki don ki briew ba shu pynthohbria ïa ka seng. Ngin hap ïashah namar haba long nongïalam ka jingshah kynthoh ka don beit.
“Naduh ba jop ka BJP ha u snem 2014 bad u 2019 kaba ka la jop marwei, bad ngam ïohi ïa kata ban ong ba ka BJP ka pyrshah Khristan. Hynrei ïa ki ïing ba duk la ai lut ha ka Jylla jong ngi ba bun Khristan, ki bym don ïing la ai lut, khaw ba duk la ai lut, um ba duk, light ba duk. Ka pyrshah Khristan kumno ka BJP haba kumta?” la ong u Bah Olan.
