Shillong, Risaw 23
Ka Hynñiewtrep Youths’ Council (HYC) ka la phah ïa ka jingthoh sha u Director jong ka North Eastern Indira Gandhi Regional Institute of Health and Medical Sciences (NEIGRIHMS), Shillong, da kaba kyntu ban buh ïa ka bhah kaba kyrpang na ka bynta ki khynnah pule kiba dei na Meghalaya ha ka jingpule B.Sc. Nursing ha NEIGRIHMS.
Ka Seng ka la pynpaw ïa ka jingsngewkhia kaba jur halor ka jingmih jong ki kyrteng kiba la shah jied ban rung klas na ka bynta ka pule 2026-2027, kaba la pynbna ha ka 07 tarik u Nailur 2026.
“Kane ka thup ka don 48 ngut ki khynnah pule, hynrei ym don wat tang u wei ruh u khynnah pule na Meghalaya uba paw ba u la ïoh rung klas,” la ong ka HYC ha ka kyrwoh.
Ka HYC ka pynshai, ba watla ka burom ïa ka jingpynbeit ban pdiang ïa ki khynnah pule na kylleng ka ri bad ïa ka nongrim jong ka jingjied katkum ka sap bad ka jinglah (merit), hynrei ki khynnah pule na Meghalaya, ki dei pat ban ïoh ïa ka lad bad ka hok ban rung sha kane ka jaka pule Nursing, kaba pawnam jong ka Sorkar Pdeng, kaba don hapoh ka Jylla hi.
Ka HYC ka la kyntu ïa ka NEIGRIHMS ban pyrkhat ïa ka rukom buh bhah kyrpang kumba la leh ha ka Regional Institute of Medical Sciences (RIMS), Imphal, bad katkum ka rukom buh bhah kyrpang na ka bynta ki khynnah pule na Meghalaya ha ka jingpule MBBS ha NEIGRIHMS.
Ka la kyrpad kyrpang ba dei ban rah ïa kane ka kam hakhmat jong ka jingïalang jong ka Governing Council kaba la buh ban long ha ka 27 tarik u Risaw 2026, khnang ba yn lah ban shim ïa ka rai ban pyntreikam ïa ka bhah kaba kyrpang ïa ki khun Samla jong ka Jylla bad ban pynkylla ïa ki kyndon rung klas kiba mynta katkum ka jingdonkam.
“Ngi ngeit ba kane ka sienjam kan plie ïa ki lad ïoh jingpule na ka bynta ki khynnah pule ka Jylla bad kan ïarap ruh ban pynroi ïa ki briew kiba tbit ha ki kam jingsumar pang bad ka koit ka khiah hapoh Meghalaya,” la ong ka HYC.
Ka HYC ka kyrmen ba ka NEIGRIHMS bad ki bor ba dei khmih kin ai ka jingbishar kaba bniah ïa kane ka jingkyrpad bad shim ïa ki sienjam kiba donkam, khnang ba ki khynnah pule kiba don ïa ka sap bad kiba bit na Meghalaya, kin ym duh ïa ka lad kaba don jingmut ban bteng ïa ka jingpule Nursing ha la ka jong ka Jylla.
