Shillong, Risaw 23
Ha ka miet jong ka 23 tarik u Risaw 2026, ki 2 ngut ki nongïalam ka Khasi Students’ Union (KSU) kiba la shah kem ha ki bor pulit, ki la ïoh jamin noh hadien 2 bnai tam eiei.
Kine ki nongïalam ba la ïoh jamin ki kynthup ïa u Samla Samla Raymond Kharjana, President, Samla Reuben Najiar, General Secretary.
Lah ban kdew ba ka jingshah kem ki nongïalam ka KSU, myn ha ka 19 tarik u Nailar 2026, kadei halor ka jingmih ka huri hura, ka jingshah thang ki kali, ka jingpynjulor ïa ki kali bad kiwei-kiwei de, kaba la jia ha ka rally thuk thuk ba pynlong da ka KSU.
Ki nongïalam ka KSU baroh kiba la shah kem ki long u Samla Raymond Kharjana, President, Samla Reuben Najiar, General Secretary, Samla Pynkmenlang Sanmiet, Vice President , Samla Jeremiah Pohthmi, Assistant Organising Secretary, Samla Samuel Kharbani, General Secretary KSU Shillong Mihngi Circle, bad u Samla Banjop Dkhar, President KSU Shillong Mihngi Circle.
Ha kane ka sngi ba lait jamin kine 2 ngut ki nongïalam, la ïadon lang ki bahaïing hasem, ki nongïalam ka KSU barim bad ki dkhot ruh kumjuh.
Hadien ba ki 2 ngut ki nongïalam ki la lait jamin noh, ki dkhot, ki nongïalam barim ka KSU ha ryngkat ka jingsynran lang ki bahaïing hasem, ki la ïaid da ka kjat na Motphran ter-ter shaduh ban poi ha ophis treikam ka seng kaba don ha Jaiaw.
Ha kane ka jingïaid kjat, ki dkhot ki la pyrta “Ka KSU kam ju pyndem, “Ka KSU kam ju aili” “Maitshaphrang Khlur Ka Ri” bad kiwei-kiwei de ki jingpyrta.
