Shillong, Risaw 23
Namar ki jingjia kawang ‘Petrol Bomb’ ba khah-khah kiba la sakhi ha nongbah Shillong, u Deputy Commissioner (DC) ka East Khasi Hills, u Abhilash Baranwal ha ka Sngi Thohdieng u la ong ba ki bor distrik ki dang trei halor ki ar tylli ki bynta – ban tei ïa ka jingshaniah ha ki paidbah bad ban thwet jur ïa ki nongleh kam sniew.
U la ong ba ki ‘Sector Magistrate’ lem bad ki ophisar ka distrik ki ïa kynjoh ktien na ka por sha ka por bad ki Rangbah Shnong, ki nongïalam shnong bad ki nongïalam ha ka imlang-sahlang ban ai mynsiem bad wanrah biang ïa ka jingsngew skhem bad jingshaniah ha ki nongshong shnong.
“Halor ka jingshong suk shong shngaiñ ha kaba ïadei bad kine ki jingjia kawang ‘Petrol Bomb’ kiba dang ïai jia, ki bor distrik ki don ar tylli ki kam ban leh. Kawei ka long ban don ki lad ki lynti ban pynskhem bad wanrah ka jingshaniah ha ki shnong ki thaw, ha ryngkat ki jaidbynriew bapher-bapher. Ïa kata la ïai bteng ban leh lyngba ki ophisar jong ngi, ki ‘Sector Magistrate’ bad ki Rangbah Shnong lem bad ki nongïalam bapher-bapher ka imlang-sahlang ban tei ïa ka jingshaniah bad jingsngew skhem halor ka jingshimkhia jong ki bor distrik,” la ong u Baranwal.
Halor ka kamram jong ki pulit, u la ong, “Ha kaba ïadei bad ka kam ki pulit, ka ophis u Superintendent of Police ka leh katba lah ban pyrshang bad pynithuh ïa ki nongleh kam sniew kiba donkti khnang ban pynngat ïa ki katkum ki kyndon aiñ.”
Haba jubab halor ka jingduna ki VDP ha sor Shillong, u la ong ba ïa kane ka kam la pynsngew ha ka kyrdan jong ka shnong.
“Kata ruh ka dei kawei na ki mat ba la pynpaw da ki ‘Sector Magistrate’ bad ki shnong ki thaw bapher-bapher,” u la ong.
