Shillong, Risaw 23
U MLA ka Mawsynram Konstitwensi, u Bah Olan Sing Suiñ u la ong, ba baroh ki MLA ka United Democratic Party (UDP), kiba la mih noh ki don la kajong-kajong ka jingsngew.
Haba kren bad u Nongsaiñ Hima ha ka sngi Thohdieng jong ka taïew, u Bah Olan Sing Suiñ u la ong “Kam dei ba ngim shaniah shuh ïa u President ka party, kata u Bah Metbah Lyngdoh, hynrei ka don la ki jong ki jong ki jingsngew”.
U la ong ba ki 8 ngut ba mih na ka UDP ban pynïasoh sha ka BJP, “Ngi la ïatip lang, katba ïa ki 3 ngut pat kiba dang shu mih bad pynïasoh sha ka NPP, ngim tip shaphang jong ki. Kam don ruh ka jingïakren ban ïa mih lang na ka UDP bad ki 3 ngut ba dang mih, da kaba bynrap “Phi mih ne phi shong ruh ngim tip”.
“Ngi ïa tip tang 8 ngut ki MLA, na bynta ka roi ka par ban ai ka jingshakri na ka party BJP ha ka Jylla, khnang ban wanrah shibun ïa ki kam pynroi,” la bynrap u Bah Olan.
