Shillong, Risaw 23
Ka Ministry of Home Affairs IS-I Division/NI-II Section, New Delhi, ka la pyntip sha ka Hynñiewtrep Integrated Territorial Organisation (HITO) da kaba kdew ba ka long kaba eh ban ithuh lane ban pynrung ïa ka ktien Khasi hapoh khyrnit ba Phra jong ka Riti Synshar ka Ri India.
Ïa kane ka MHA ka la phah lyngba ka e-mail ha ka 13 tarik u Risaw 2026 ban jubab halor ki jingkylli bad ka jingpan jingshai ka HITO ïa ka jingpynrung ïa ka ktien Khasi hapoh ka Khyrnit ba Phra ka Riti Synshar ka Ri. Katba ka HITO ka pyntip ïa kane ka jingïoh jubab sha ki nongthoh khubor ha ka 23 tarik u Risaw 2026 bad bynrap ba kane ka jingïoh jubab ka long hadien lai bnai tam ba ka HITO ka la phah ïa ki jingkylli.
Katkum katei ka shithi, ka Ministry of Home Affairs ka la ong, ba ha kaba ïadei ka jingpynrung ïa ka ktien Khasi ha ka khyrnit ba phra jong ka Riti Synshar ka Ri, ka tnad ka kwah ban pyntip ba ïa mynta 22 tylli ki ktien la pynrung bad ki jingdawa ban pynrung shuh-shuh ki la nangbun da kaba kdew ruh ïa ka ktien Khasi.
Ha kane ka shithi, ka MHA ka la pynsngew ruh halor kine ki jingdawa bad na ka jingkylla ha ki ktien tnad (Dialect) bad ki ktien (Languages) ka ïaid shakhmat, hynrei ha ki jingkylla ha ka imlang sahlang, ka ïoh ka kot bad ka saiñ hima sima, ka long kaba eh ban pynbeit ïa kano-kano ka kyndon na ka bynta ki ktien, la ka long ban pynïapher ïa ki na ki ktien tnad (Dialect), ne ban pynrung ha ka Khyrnit kaba Phra jong ka Riti Synshar.
Ki jingpyrshang kiba kham mynshuwa, lyngba ki Komiti Pahwa (1996) bad Sitakant Mohapatra (2003), ban pynwandur ïa kum kine ki kyndon ki sah khlem da lah ban pynkut. Ka Sorkar India ka sngewthuh ïa ki jingsngew bad ki jingdonkam ban pynrung ïa kiwei pat ki ktien ha ka Khyrnit kaba phra, hynrei kum kine ki jingkyrpad hap ban pyrkhat da kaba buh ha ka jingmut ïa kine ki jingsngew bad kiwei-kiwei ki jingpyrkhat kiba ïadei.
Kum ban shu pyntip ïa kane ka shithi la phah da ka Alice Roseline Tete ka ophisar hapoh ka Central Secretariat Service (CSS) jong ka Sorkar India bad kaba long mynta kum ka Director jong ka National Integration (NI) Wing hapoh ka Ministry of Home Affairs (MHA).
