Shillong, Risaw 23
Jan 200 kilo ki waiar ki bym treikam shuh bad ki synduk kiba don ha ki ‘post’ ilektrik ha kylleng ka Shillong la pynhap bad weng noh katba ki bor distrik ki dang ïaleh katba lah ban pynkhuid ïa ki waiar kiba la tawah bad sdien hajrong ha kylleng ki bynta ka sor hapoh shibnai.
U Deputy Commis-sioner ka East Khasi Hills, u Abhilash Baranwal ha ka Sngi Thoh-dieng u la ong ba hadien ka jingjurip ba la pynlong ba ïa kane ka kam la leh katkum ka jingbthah jong u Myntri Rangbah ka Jylla, u Conrad K. Sangma.
“Katkum ka jingbthah jong u Myntri Rangbah ka Jylla, baroh ki waiar kiba la noh rynjup la pynbeit bha noh ïa ki. Bun ki waiar kiba ïaid napdeng ar tylli ki ‘post’ ilektrik la dep ban teh bha katba lah.
Ha kajuh ka por, la weng noh ruh ïa kiba bun ki waiar bad kiba bun ki synduk ki bym pyndonkam,” la ong u Baranwal.
“Ka jingthmu baroh kawei jong kane ka kam ka long ban peit kaei pat kaba lah ban leh ban pynbha ïa ka jingitynnad halor kumno kine ki waiar ‘Telecom’ ïa mynta ki dang phriang ha kylleng ka sor,” u la ong.
U la ong ruh ba ka bynta kaba nyngkong ka la kynthup ïa kiba bun ki jaka ba kongsan.
“Kumba la pyntip da ki ophisar jong nga, ïa ka bynta kaba sdang jong kane ka kam la pyndep ha kiba bun ki jaka ba kongsan jong ka sor, hynrei lyngba kane ka jingleit jurip, ngi pyrshang ruh ban sngewthuh kumno ngi lah ban pynbha shuh-shuh ïa kane,” u la ong.
Halor ka jingpyntreikam, u la ong, “Ki don katto-katne ki kyndon kiba ngi la shna, kumno ban pynbeit ïa kine ki waiar ‘Telecom’. La pyntreikam ïa ka kyndon jong ka jingjrong kaba duna tam. Ngi kyrpad ruh ïa ki ban buh dak bad wat lada kim lah ban buh dak ïa u waiar uba ïaid napdeng ar tylli ki ‘post’ ilekstrik, hynrei kin hap ban buh dak ïa ki ‘loop’ bad ki synduk bapher-bapher.”
“Ïa kine ki jait kyndon la pyntreikam bad kito ki bym kohnguh, yn weng noh ïa ki waiar, ki synduk, ki jingtei jong ki ha uno uno u ‘post’ ilektrik. Kumta la dep ban leh ïa kata,” u la ong.
“Kane ka dei ka jingtreikam kaba dang ïaid shakhmat bad ngi kyrmen ban pyndep ïa kane hapoh shibnai,” la bynrap u Baranwal.
U la ong ba kane ka sienjam ka don jingïadei bad ka kam pynitynnad kaba la thmu.
“Hooid, ka dei shi bynta ban pynitynnad ïa ka Shillong. U Myntri Rangbah ka Jylla u la pynpaw ïa ka jingsngewkhia halor kine ki waiar na ka por sha ka por, bad katkum ka jingbthah jong u, la ïaid shakhmat bad kane ka jingpynitynnad bad jingpynbeit ryntih baroh kawei,” u la ong.
Da kaba maham pyrshah ban ym tawah shuh ïa ki waiar thymmai, u la ong, “Lada don mano-mano ba kwah biang ban tan ïa u waiar napdeng ar tylli ki ‘post’, ki lah ban teh ïa u waiar thymmai jong ki bad ki waiar ba la teh bha lane ki lah ban tawah kylluid biang ïa ki. Lada ki leh ïa kum kine ki jait kam, kita ki waiar kin shah ot bad yn weng noh ïa ki.”
