Shillong, Risaw 23
U Bah V.G.K Kynta uba dei u kyrtong ka United Democratic Party (UDP) u la pynpaw ba u la rai rangbah ban ïakhun beit ïa ka ilekshon MP Lok Sabha shiteng samoi.
U Bah Kynta u la ong ba watla ki 11 ngut ki MLA ka UDP ki la mih noh ban leit pynïasoh sha kiwei ki seng hynrei un nym kynrandien haba ka UDP ka la dep ai tiket ïa u ha kine ki sngi ban ïakhun ïa ka ilekshon MP Lok Sabha.
“Lada nga kynrandien, nga la dei uba la rem lypa bad ki paidbah kin sa dom ïa nga” u la ong.
U la pynpaw ba um da khuslai than ban ïakhun ïa kane ka ilekshon wat lada ki 11 ngut ki MLA ki la mih noh namar ban rai ïa ka jop ka rem dei ki paidbah.
U la ong ha ka ilekshon MP, ki paidbah kim ju peit ïa kano-kano ka seng hynrei ki peit ïa u briew uba lah ban kren ha Parliament ban ïasaid ïa ka jingeh jong ka jaidbynriew bad ka Jylla baroh kawei.
U la kynthoh ruh ba ka NPP ruh haba ka don ha ka Sorkar synrop kam dei ban kam ba ïa ki kam pynroi la leh ma ka hynrei ka UDP ruh ka don bynta lang namar ka don lang ha ka Sorkar.
Kumban shu pynkynmaw ba kine ki 11 ngut ki MLA kiba mih nyngkong ki dei 8 ngut kiba la leit pynïasoh sha ka BJP bad hadien sa lai ngut kiba leit pynïasoh sha ka NPP.
