Nongpoh, Risaw 23
U Bah Sosthenes Sohtun, Myntri ka tnad C&RD ka Jylla uba dei ruh ha ka juh ka por u MLA ka thaiñ, ha ka sngi Thohdieng u la pyllait paidbah ïa ka skhim pynroi kiba la bei tyngka da ka National Clean Air Programme (NCAP) ha ka jinglut kaba T.1.46 klur hapoh ka thaiñ Byrnihat, Ri Bhoi District.
Kitei ki skhim pynroi kiba la mang naduh u snem 2023-24 bad kiba la aiti sha ki 20 tylli ki shnong kiba hap hapoh ka thaiñ Byrnihat ki kynthup ïa 6 tylli ki kali kit ñiut kiba la tip kum ki Electronic Waste Collection Vehicles, 3 tylli ki kali pynkhuid surok kiba la tip kum ki Mechanical Road Sweeper bad ki jaka thep ñiut lane ki dustbin kiba yn sam sha kumba palat shi hajar ngut ki longïing ka thaiñ.
Ka Byrnihat kaba la pawnam ha kine ki khyndiat snem ba la dep kum kata ka jaka ba don ïa ka lyer kaba jaboh tam ha ka pyrthei, kala ïoh ïa kine ki skhim kum shi bynta ban pynkhuid ïa ki shnong ki thaw nalor kiwei-kiwei de ki projek ban pynkhuid ïa ka lyer jaboh bad wanrah biang ïa ka mariang kaba khuid ba suba bad kaba koit ba khiah.
Ha kane ka jingïalang kaba la pynlong ha Moonlight English Secondary School la wan ban ïadon ryngkat u Dr. Abhishek Saini, Deputy Commissioner ka Ri Bhoi, u Bah Eric Kevin Dkhar, Block Development Officer ka Umling C&RD Block, u Raja Brahma Director ka District Rural Development Agency nalor ki ophisar na ka Meghalaya State Pollution Control Board, ka PWD bad kiwei-kiwei ki tnad treikam Sorkar.
La sakhi ruh ha kane ka sngi ïa ka jingwan ïashim bynta ki nongïalam shnong jong ki 20 tylli ki shnong kiba hap hapoh ka Byrnihat Circle, ki paidbah nongshong shnong ka thaiñ lem bad ki khynnah skul.
Haba ai jingkren ha katei ka jingïalang, u Bah Sosthenes u la ai ka jingïaroh sha ka ophis jong u Deputy Commissioner ka Ri Bhoi lem bad u Block Development Officer ka Umling C&RD Block kiba la shimkhia ban pynïoh ïa kitei ki skhim na ka NCAP kaba hap hapoh ka Ministry of Environment, Forest & Climate Change ka Sorkar Pdeng.
U la kyntu ruh ïa ki paidbah ba kin pyndonkam hok bad sumar bha ïa kitei ki kali bad ki tiar kiba ki la ïoh ha kane ka sngi, khnang ba kan long ka jingmyntoi ïa ki shnong ki thaw bad paidbah ka thaiñ hi baroh kawei.
Ha kaba ïadei pat bad ka jingïoh nam ka Byrnihat kum ka jaka ba jaboh tam ka lyer ha ka pyrthei ha kine ki khyndiat snem ba la dep, ki nongkren ba kynthup naduh u Bah Sosthenes Sohtun, u Dr. Abhishek Saini bad u Bah Eric Kevin Dkhar, ki la pynpaw ba ka kam lehkhuid lehsuba kam dei satia tang jong ka Sorkar, hynrei ka donkam ïa ki paidbah nongshong shnong baroh ba kin shim ïa ka jingkitkhlieh ban pynlong ïa ki ïing ki sem bad ki shnong ki thaw ki jong ki, kiba khuid ba suba.
