Shillong, Risaw 25
Ka Thma U Rangli Juki (TUR) ka la dawa ïa ka Sorkar ba ka dei ban pynduh pyndam mardor ïa ka Shillong Ropeway Project kaba shongdor T.151 klur tyngka, da kaba kynnoh ba ka don ka jingai jingmut thok, ka pynjot ïa ki tyllong um bad ka
jingpynlud kai ïa ka Pisa.
Ka TUR ka la aiti ïa ka shithi sha u Chief Ropeways Inspector-cum-Member Secretary Licensing Authority, u B. M. Syiem, halor ka jingailad jong ka Sorkar ban phah ïa ki jingai jingmut bad ki jingpyrshah halor kane ka projek.
Ha kane ka kyrwoh khubor ka Kong Angela Rangad, ka la pynpaw ba ka TUR ka pyrshah jur haba ïadei ka jingwanrah ka Sorkar ïa katei ka Projek kaba don shibun ki jingbym bit bym biang bad kaba la pynjot ïa ka Mei Mariang ïa kaba ki paidbah ruh kim ai ka jingkyrshan.
Shuh-shuh ka TUR ka la ong ba ka jingkam jong ka Sorkar ba la ïoh ïa ka jingmynjur na ki paidbah kam ïahap bad ka jingshisha, ha kaba ki nongshong shnong kiba shah ktah ha Laban Pyllun bad Lum Shyllong bad ki paidbah ka Shillong baroh kawei, kim shym la ïoh ka jingtip ba biang lane ka jingïasyllok kaba shisha halor kane ka projek.
“Kane ka projek ka don ha ka jaka lum jong Lum Shyllong ba long kawei na ki tyllong um ba kongsan ïa ka nongbah Shillong. Watla ki jingpynshai jong ki bor Sorkar ki ong da kumwei, haduh 545 tylli tam ne duna ki dieng la shah pom, ka la pynjulor jur ïa ka khlaw bad ka Mariang. Ka jingpom ïa ki dieng ha kane ka jaka lum ka buh jingma ïa ki tyllong um bad ki pung um kiba mih na ki khyndew bad ka lah ban wanrah ïa ka jingduna um kaba jur ha Shillong” la ong ka TUR.
Shuh-shuh ka TUR ka la ong ruh ba ka Ropeway kam donkam eh namar la don lypa ka surok, hynrei ka daw ba kongsan kaba la ai na ka bynta kane ka Ropeway ka long ban pynsuk ïa ki briew ban leit sha Shillong View Point, hynrei kane ka daw kam long shuh kaba biang, namar ka surok kaba mih na Upper Shillong ka la dep pynheh sha ka surok bad ka lah ban pynpoi ïa ki nongwan jngohkai sha ka jaka khlem da donkam ïa ka Ropeway.
Haba bynrap ka TUR ka la ong ba ka Sorkar kam dei ban shu kular thok ne pynbeit ïa ki paidbah haba ïa dei ka ïohkam lyngba kane ka projek, ba ka Sorkar ka dei ban pyni ïa ki jingshisha ba kane ka Ropeway kan long ka jingmyntoi ïa ki nongshong shnong. “Ka Sorkar ka dei ban burom ïa ka Sur jong ki paidbah bad ba ka dei ban pyndam noh mardor ïa ka Shillong Ropeway Project”.
