Shillong, Risaw 25
Ka Hynniewtrep Youth Development Council (HYDC) West Jaintia Hills District ka dang bteng ban pynlong ïa ka Labour and Employment Survey ha West Jaintia Hills District ban lum jingtip shaphang ka jingïoh kam bad ka jingtrei jong ki nongshong shnong hapoh ka District.
Ha kane ka jingpynlong ïa ka Survey la don ryngkat u Bah Shemborlang Thabah ba long u dkhot jong ka HYDC-CEC bad la ïalam ïa ka Survey da u Bah Firmly Ryngkhlem President HYDC West Jaintia Hills District, ryngkat ki dkhot.
Ha kane ka Survey kaba ka seng ka la sdang naduh Phramer ter ter shaduh Jowai, ka seng ka la shem ba bun na ki nongtrei kiba trei ha ki Dhaba, Petrol Pump bad Shopping Mall ki dei kiba wan na shabar Jylla, khamtam eh na ka Jylla Rajasthan.
Ka jingbun jong ki bar Jylla ba ïoh kam ïoh jam hapoh ka Bri Hynniewtrep ka la buh jingeh kaba khraw ïa ki khun samla. Ka HYDC ka ngeit ba ka jingdonbun jong ki nongtrei na shabar Jylla ka long ruh kawei na ki daw ba ki khun samla ka Jylla kim ïohlad satia ban bylla ban sngi ha la ka jong ka Ri.
Kawei pat ka mat kaba ka HYDC ka sngewkhia bha ka long ba ka Minimum Wage kaba la buh da ka Sorkar Meghalaya kam shem la treikam ha West Jaintia Hills District. Ka Minimum Wage Act ka long kum ka aiñ kaba la shna tang ban shu buh sah jingkynmaw. Kiba bun ki nongtrei trai ri ki ïoh ïa ka tulop kaba T.4000 haduh T. 8000 kaba ka por treikam pat ka long 10 ne 12 kynta.
Da kane ka kyrwoh, ka HYDC ka kwah ban pynpaw sha ka Sorkar Meghalaya ba ka jingdawa la long ban thaw noh ïa ka Comprehensive Employment Policy. Ka jingpynlong ïa ki Labour and Employment Survey ruh ka dang ïaid shakhmat ha ki District bapher-bapher jong ka Bri Hynniewtrep, ban lum ïa ki jingshisha bad ki jingtip kiba bniah shaphang ka jinglong jingman jong ka ïoh kam ïoh jam ki khun samla ha ka Jylla.
Ka HYDC ka la pynpaw ba ka don ka jingkyrmen ba hadien ba la dep lum bad phah sha ka Sorkar ïa ki jingtip na baroh ki District, ka Sorkar Meghalaya kan shim ïa ka sienjam ba donkam ban thaw noh ïa ka Comprehensive Employment Policy, kaba lah ban ai ïa ki lad ban ïohkam ïohjam ki khun samla ka Bri u Hynniewtrep.
