Shillong, Risaw 25
U Dr. Wanweiroi Kharlukhi uba dei u MP barim ka Rajya Sabha bad ruh u President barim ka NPP Meghalaya un leit ban ai jingkyrshan pura ïa u Bah Vincent H Pala, uba dei u kyrtong ka Congress ha ka ilekshon MP shiteng samoi ka ban sa long shen.
Kane ka jingleit ai jingkyrshan u Dr. WR Kharlukhi ïa u Bah Vincent H Pala, yn pynthikna lashai ka sngi ka 26 tarik Risaw 2026 ha ka por 3 baje janmiet ha Heiga Hotel Shillong ha ka jingïadonlang ki nongkitkam ka Congress bad ki nongkyrshan.
Haduh mynta u Dr. Kharlukhi haba u la mih na ka NPP um pat leit pynïasoh bad kano kano ka seng saiñpyrthei hynrei lashai ka sngi un sa pynpaw pyrthei ba un leit ai jingkyrshan ïa u Bah Vincent Pala.
Watla u Dr. Kharlukhi un shu leit ai jingkyrshan ïa u Bah Vincent Pala hynrei la sngewthuh ba suki suki un sa rung pura sha ka Congress.
Kumban shu pynkynmaw u Dr. WR Kharlukhi u la mih noh na ka NPP ha kine ki bnai ba la dep hadien ba ka samoi treikam jong u kum u MP ka Rajya Sabha ka la kut bad ka NPP ka la thung bujli da u James Sangma uba dei u hynmen jong u Conrad K Sangma uba dei u Myntri Rangbah ka Jylla bad President ka NPP.
Da ka jingwan ai jingkyrshan u Dr. Kharlukhi ïa u Bah Vincent kan ai mynsiem ïa ki nongkyrshan Congress bad ka lah ban pynduh mynsiem ïa u Dr. DRL Nonglait u kyrtong ka NPP.
