Shillong, Risaw 26
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka jingïakren bad ka Khasi Students’ Union (KSU) ka kynthup ïa ki jingsngewkhia ba ïadei bad ka thungkam thung-jam ha NEIGRIHMS bad ki ‘Facilitation Centre’ ka MRSSA, bad kular ruh ban ïai bteng ïa ki jingïakren ha ka ban wad ïa ki lad jingpynbeit.
Ha ka jingthoh ha ‘X’ hadien ba la wai ka jingïalang, u Conrad u la thoh, “La ïakynduh bad ki nongïalam ka Khasi Students’ Union (KSU) ban ïakren halor ki mat ba kongsan ba la pynsngew da ka seng.”
U la ong, “Ki jingïakren jong ngi ki kynthup ïa ki jingsngewkhia kiba ïadei bad ka jingthungkam thung jam ha NEIGRIHMS, ki ‘Facilitation Centre’ bad ki rukom treikam jong ka MRSSA nalor kiwei.”
“Ngin ïai bteng ban ïashim bynta ha ki jingïakren kiba tei ban weng ïa kine ki jingeh bad ban trei ha ka ban wanrah ïa ki lad jingpynbeit kiba ïada ïa ki jingmyntoi jong ki briew jong ngi,” u la bynrap.
Ka KSU kaba la buddien ïa ki 5 tylli ki mat naduh ka 3 tarik u Nailar, ka la ong ba ka Sorkar ka la kular ban sdang noh shen ïa ka Umling Facilitation Centre bad ban shimkhia ruh ïa ka jingdawa (bhah) kaba 80:20 haba ïadei bad ka NEIGRIHMS bad ka Sorkar Pdeng.
Shuh shuh ka seng ka la dawa ban pynduh noh ïa ka projek Shree Cement, ban wanrah jingkylla ha ka jingpynrung kam ha ka MPSC/DSC bad ban pynmih ruh ïa ka jingpynbna jong ka ‘Migrant Workmen Act’ ba la pynkylla.
