Shillong, Risaw 26
U nongïalam ka Congress ha Meghalaya u Bah Vincent H. Pala u la ong ba ka lyer kaba la beh jong ka VPP ha u snem 2024 ka la jah noh bad ka jingkyrshan jong ki paidbah ka la hiar jur bha ha kylleng ka ri Khasi bad Jaiñtia.
Haba ïakren bad ki nongthoh khubor, u Bah Vincent u la ong ba ka jingkylla ha u snem 2024 ka pher na kaba ka long mynta namar ha kito ki por ka jingkylla ha ka ‘social media’ ka khlaiñ bha.
U la ong ba ka VPP ka la ïoh ïa ka jingkyrshan kaba heh tam na Mylliem, hynrei ha kane ka kynti u la ïohi ba ka jingkyrshan ka la hiar bha. Ki la ïoh ïa ka jingkyrshan kaba khraw na Sohra bad ki thaiñ khappud kum ka Pynursla, hynrei mynta ka la hiar bha wat shaduh Jaiñtia ruh.
U la ong ba ki nongthep vote kin shim ïa ka rai kaba khatduh tang hadien ba la pynbna bad thep kyrteng.
“Kane ka ilekshon kan long ka jingïaleh kaba lai tylli ki seng kata hapdeng ka Congress, ka NPP bad ka VPP, hynrei ki briew kin nym rai tad haduh bad lymda la pynbna ïa ka ilekshon bad uwei pa uwei u kyrtong un thep kyrteng,” u la ong.
Haba thmu ïa ka jingsynshar jong ka VPP ha ki District Council, u Bah Pala u la ong, “Bun ki khyrdop ki wan khlem ka jingshai bad khlem ka jingkitkhlieh bad bun ki Syiem ki shah pynhap khlem kano-kano ka daw kaba biang. Ki la leit sha ka ïingbishar bad ki la jop ïa ka mukotduma.”
U la bynrap ba kane ka pyni ba kim lah wat ban synshar ha District Council, kumno phin khmih lynti ba kin synshar ha Delhi bad kumjuh ruh ha ka Jylla.
“Ki paidbah ka Meghalaya kim dei kiba bieit, phi lah ban bieit ïa ki shisien ne arsien hynrei ym lai sien,” la ong u Bah Pala.
Shuh shuh u la ong ba ka UDP bad ka NPP ki dei ki seng kiba shu leit shim wai ïa ki kyrtong namar ki la jied ïa ki briew kiba nabar ym na ki nongkitkam ne ki nongtrei jong ka seng hynrei dei tang ka Congress kaba pynïeng ïa u kyrtong uba na ka Congress.
