Shillong, Risaw 30
U Bah Brightstarwell Marbaniang, MLA ka Mawlai Konstitwensi u la lam khmat ïa ki ophisar na ka NHIDCL, PWD (Roads), kiba dei na ka National Highway Division, Central Division bad Umsning Division bad kiwei-kiwei pat ha ka jingjurip ïa ki surok kiba donkam ban pynbha bad shna pynheh ha ki bynta bapher-bapher ka Mawlai.
Haba batai bniah halor katei ka jingjurip ha ka 29 tarik u Risaw, 2026, u Bah Brightstarwell u la ong ba ka jingjot ki surok, ka dei namar ba kim don ki nala ban pynïaid.
U la ong ba la jurip ïa ka bynta jong ka National Highway na Mawlai Police Station shakhmat namar ka jingbym don ki lynti ïaid kjat harud surok, kaba la buh jingma ïa ka leit ka wan ki nongshong shnong.
U la ïathuh ba ha katei ka jingjurip, uwei na ki engineer katba dang ïa jurip, u la jan shah tynrah ha ka kali namar ba hap ban ïaid ha surok.
Shuh shuh u la ong ba nalor katei ka jaka, ka la don ka jingjurip ïa ka surok ha Mawlai Petrol Pump, Lummawnei kaba dangïaid shakhmat ha ka jingpyntrei, ka surok sha Seng Khasi bad kiwei-kiwei pat ki bynta.
“Ngi sngewsynei eh ka long, ba ki khynnah skul namar ba ym don ka lynti ïaid kjat ki la hap ban ïaid na kajuh ka surok kaba ïaid ki kali. Ha ka jingjurip na ka liang jong nga, nga la bthah ïa ki engineer ba kin hap ban pynbha biang ïa ka lynti ïaid kjat bad ruh ban pynbha ïa ka surok,” la ong u Bah Brightstarwell.
Kum u MLA hi, la kumno-kumno ar sien ha ka shi snem, ka ju don ka jingïalang pyrkhat kam ryngkat ki engineer ka tnad PWD bad ka PHE bad kiwei-kiwei de ki tnad treikam ba dei khmih hapoh Mawlai baroh kawei, ban peit ïa ki kam projek hapoh Mawlai.
