Shillong, Risaw 30
Tang shi-sngi hadien ba ïoh mih ki arngut ki nongïalam ka KSU Shillong Mihngi Circle, ha ka janmiet jong ka Sngi Thohdieng u samla Jeremiah Pohtmi, u ba long u Assistant Organising Secretary ka Khasi Students’ Union (KSU) Sengkmie u la ïoh jamin bad mih na Shillong District Jail.
U samla Jeremiah Pohtmi u dei uba la shah kem ryngkat kiwei pat kiba dang lait mynin kynthup ki nongïalam ba hakhmat ka KSU kiba la lait ha ka taïew ba la dep kiba shah kem ha ki pulit halor ka jingmih ka huri hura ha ka bike rally ha nongbah Shillong ha ka 19 tarik Nailar 2026.
Baroh ki nongïalam, ka KSU kiba la shah kem ki la ïoh jamin bad mih noh na along, katba u Vice-President ka KSU u samla Pynkmenlang Sanmiet u dang don ha ka jamin ba shipor lane ka Interim bail na ka jingai jamin ka Kashari na bynta ban pyndep ïa ka jingsumar ïa ka jingshitom jong u.
Ki nongïalam ryngkat ki dkhot ka KSU ki la pdiang burom ïa une u samla hakhmat ka khyrdop jong ka Shillong District Jail ha ryngkat ka jingpyrta ba “Ka ïing byndi ka dei ka skulbah”.
