Nongpoh, Risaw 30
Ki nongïalam ka Hima Jirang ba kynthup naduh u Acting Syiem, u Pa’iem R.J. Wahlang, u Syiem Khynnah, Pa’iem S. Wahlang, Syiem Khynnah, u Bah Sranly Wahlang, General Secretary lem bad kiwei-kiwei ki nongïalam mynta ka sngi, ki la leit jurip ïa ka jingkieng ha Umshru hapoh ka Hima Jirang, kaba la wan tei da ka Sorkar Assam.
Kumban shu kdew, na ka liang ka Hima Jirang ka la dep ban ujor sha ka ophis u Deputy Commissioner ka Ri-Bhoi halor katei ka jingwan kam trai bad tei be-aiñ da ka Sorkar Assam ïa katei ka jingkieng hapoh katei ka shnong Umshru kaba don ha ki thaiñ khappud kaba dang hap pura hapoh u pud u sam ka Hima Jirang.
U Bah Sranly Wahlang haba kren sha ki lad pathai khubor u la ïathuh ba ha kane ka jingjurip mynta ka sngi kaba la wan ban ïadon ryngkat naduh ki bor pynïaid distrik ka Ri-Bhoi bad na Assam ruh kumjuh ka dei hadien ba ka Hima Jirang ka la dep ban ujor sha u DC ka Ri-Bhoi ha ki khyndiat por kiba la dep.
Haba kren sha ki lad pathai khubor, u Bah Sranly Wahlang, u la ong ba katei ka jingjurip ki briew ka Sorkar Meghalaya bad Assam sha katei ka jaka, ka dei hadien ba ka Hima Jirang, ka la leit ban ujor sha u DC Ri-Bhoi.
U la ong ruh ba ïa katei ka jingkieng la pyntrei da ka tnad PWD ka Jylla Assam bad kumba long mynta, i-kumba kam poi shaei-shaei ruh naba katei ka jaka la kam trai da ki briew na Assam bad ruh na Meghalaya, bad pynshai ba katei ka jaka ka dei kaba dang hap hapoh ka Hima Jirang.
U Bah Sranly u la ong ruh ba kum ka Hima ka dawa ba ka Sorkar Assam ka dei ban pynsangeh mardor ïa katei ka jingpyntrei ïa katei ka jingkieng tad haduh ba la pynbeit da kumwei ne ka jingïakren hapdeng ka Sorkar Meghalaya bad Assam.
U la ong ruh ba ha kajuh ka por ba lada ka Assam ka kwah ban shna jubor ïa katei ka jingkieng, kam dei satia ban thoh ha ki mawnongrim ba la tei da ka Sorkar Assam, hynrei ban don da ka soskular hapdeng ki ar Jylla, kata ka Meghalaya bad Assam ba ïa katei ka jaka ym dei ban kam trai da mano-mano ruh.
