Shillong, Naiwieng 01
Ka Seng Kynthei Malki Pyllun lyngba ka Kong Marry Everest Bamon Vice President, ka la mih shakhmat ban pynpaw ka jingbitar ïa ka tnad kam jngohkai ka Sorkar Jylla, halor ka jingbym leh ei-ei ïa ka jingdawa ki longkmie na Riat Laban Dorbar Pyllun ha ka shatri jong ka Joint Action Committee (JAC), pyrshah ïa ka projek Ropeway na Madan Laban sha Shillong View Point.
Haha kren sha ki lad pathai khubor ka Kong Marry Everest Bamon ka la pynpaw ïa ka jingsngewkhia halor ka jingpom dieng na katei ka jaka, kaba lah ban ktah ïa ka mariang, ym tang na katei ka jaka hynrei wat shaduh Malki bad ïa ka Nongbah Shillong hi baroh kawei.
Haba pynpaw ban ai ka jingkyrshan ïa ki longkmie na Laban kiba la ïeng pyrshah, ka Kong Marry Everest Bamon ka la kyntu ïa nongïalam shnong ka Riat Laban ban weng ïa ka jingïateh kular, ban shna ïa katei ka projek.
“Kum ha Malki, ka shnong kam shah ban ïaid surok na Laitkor, namar ka ktah ïa ka mariang bad kan wanrah ïa ka jingjakhlia,” la pynpaw ka Kong Marry.
“Ngi pynpaw ka jingkyrshan ïa ka jingpyrshah shna Ropeway ha katei ka jaka, bad ki la dei ban rah ïa kane ka projek sha ki shnong ba riat bad ba them, kiba donkam ban kit ban bah ïa ki nongpang. Kum kane ka Ropeway, la donkam ban rah sha ki jaka them ki bym don surok ban ïaid,” ka la ong.
Kumta ka la kyrpad ïa ka Sorkar hapoh ka jingïalam u Conrad K Sangma, ba un ai jingmut sha ka tnad kam jngohkai ka Sorkar, ban wengnoh ïa katei ka projek na Laban.
“Ngi hap ban kyrshan ïa ka jingïakhih pyrshah Ropeway ki nong Laban, namar ba ngi donkam ïa ka um, ngi donkam ka lyer. Watla ngim dei ki stad saian hynrei ha u Lum Shyllong, don bun ki tyllong um. Mynta ngim pat don ka por ba kyrduh ym haduh katta-katta namar ba dangdon ki dieng ki siej. Hynrei ban ïohi ka jingpynkhyllem ïa ki dieng ha Laban, ngi sngewsih bad isynei bad kan sa ktah bha ïa ka mariang,” la bynrap ka Kong Marry.
Kumta ka la kyntu sha baroh ki paidbah ka Nongbah Shillong, ban ïa mih ryntih baroh ban pyrshah ïa kane ka projek Ropeway ha Laban sha Shillong View Point bad ban dawa wengnoh mardor bad rah sha ki jaka ba donkam ïa kane ka projek.
