Shillong, Naiwieng 01
U Myntri Rangbah ka Jylla u Conrad K Sangma u la ai khublei ïa u Myntri Rangbahduh ka Ri u Narendra Modi bad ïa ka Myntri pla pisa jong ka Sorkar Pdeng ka Nirmala Sitharaman hadien ba ka Jylla Meghalaya ka la ïoh ïa ka pisa kaba T.688 klur kum ka Advance Tax Devolution na ka Centre.
U Conrad ha ka jingthoh jong u ha ka X jong u la ong, “Ka jingsngewnguh kaba khraw ïa u Myntri Rangbahduh ka Ri u Shri @narendramodi ji, u ba la pyllait ïa ka Advance Instalment of Tax Devolution sha ki Jylla. Kane ka jingkyrshan ba biang por kan pynkhlaiñ ïa ka jinglong jingman jong ki Jylla ha ka liang ka pisa tyngka, kan pynlah ïa ki Sorkar ban pyndep ïa ki jingkular pisa jong ki na ka bynta ka jingbha jingmiat jong ki nongshong shnong bad ban pynsted ïa ka roi ka par jong ki nongshong shnong”.
Nalor kata u la ong, “Nga ai khublei ruh ïa ka Myntri pla tyngka jong ka Sorkar Pdeng, ka Smt. @nsitharaman ji, na ka bynta ka jingsngewthuh bad jingshimkhia jongka ban bteng ïa ki jingdonkam pisa jong ki Jylla” u la ong.
Kane ka pisa ka dei shi bynta jong ka Additional Instalment kaba T.1,09,019 klur ba la pyllait da ka Sorkar Pdeng sha ki Jylla ha ka 31 tarik u Risaw 2026.
Katkum ka jingpynbna paidbah, kane ka dei ka sien ba ar jong kane ka Additional Instalment jong une u snem mang tyngka, ba la pyllait khnang ban pynlah ïa ki Jylla ban pynsted ïa ka jingpynlut pisa shwa ka aiom lehkmen bad ka bhah jong ka Meghalaya kaba la kot sha ka T.688 klur la Credit ha ka sngi Saitjaiñ.
