Shillong, Naiwieng 01
Ka jinghiar shuki noh u Bah Metbah Lyngdoh kum u Myntri ka Sorkar MDA-2, hadien ba u la sah marwei ha ka United Democratic Party (UDP), ka jingkylli mynta ka mih hato u Conrad K Sangma uba dei u Myntri Rangbah ka Jylla un pynrung ïa u Bah Paul Lyngdoh ne un pynrung uwei na ki MLA barim ka UDP kiba la rung sha ka BJP.
Haba ka shuki Myntri ka la thylli mynta, u Myntri Rangbah ka Jylla u hap ban pynrung bujli noh mynta ka taïew hadien ba u Bah Metbah Lyngdoh u la hiar shuki ha ka janmiet jong ka 31 tarik Risaw 2026.
Katkum ki tyllong khubor la ong ba u Conrad u lah ban pynrung Myntri ïa u Bah Paul Lyngdoh uba dei u MLA na West Shillong Konstitwensi hadien ba u la leit pynïasoh sha ka National People’s Party (NPP) ryngkat ki ar ngut ki MLA ka UDP kata u Bah Renikton Lyngdoh Tongkhar na Mawkyrwat Konstitwensi bad u Bah Nujorki Sungoh na Mowkaiaw Konstitwensi.
Shuh shuh sa kawei ka khubor ka ïathuh ba lada u Conrad K Sangma um lah ban pynrung ïa u Bah Paul Lyngdoh, u lah ban pynrung uwei napdeng ki phra ngut ki MLA barim ka UDP kiba la dep pynïasoh sha ka BJP.
Ha kine ki sngi, kine ki phra ngut ki MLA ka UDP kiba la rung sha ka BJP lait noh u Bah Lahkmen Rymbui uba la dei lypa u Myntri, ka la mih ka kyrteng u Bah Kyrmen Shylla na Khliehriat bad u Bah Mayralborn Syiem na Nongpoh Konstitwensi kiba long hakhmat ban rung kum u Myntri ha ka Sorkar MDA-2.
Na ka jingrung ki lai ngut ki MLA barim ka UDP, ka NPP mynta ka la don 36 ngut ki MLA baroh hapoh ka ïingdorbar thawaiñ kaba 60 ngut ki dkhot, kaba la lah ban synshar marwei ïa ka Sorkar khlem da donkam shuh ka jingkyrshan na kiwei ki seng saiñpyrthei.
Ki seng saiñpyrthei kiba ïasynroplang bad ka NPP ki long ka BJP kaba don 10 ngut ki MLA, ka HSPDP kaba don ar ngut ki MLA, ka UDP kaba don mynta sa tang uwei u MLA bad ki MLA shimet.
Kumban shu pynkynmaw ka jinghiar shuki Myntri u Bah Metbah Lyngdoh ka dei hadien ba u la sah marwei kum u MLA ha ka UDP, hadien ba ki 11 ngut ki MLA ka UDP ki la mih noh kata 8 ngut kiba leit pynïasoh sha ka BJP bad 3 ngut ki la leit pynïasoh sha ka NPP.
Shuh shuh ka jingsdang or pait ka UDP ka daw ka dei namar ba kane ka seng hapoh ka jingïalam u Bah Metbah Lyngdoh kum u President, ki la pynhap shuki Myntri ïa u Bah Paul Lyngdoh bad Bah Kyrmen Shylla bad pynrung bujli Myntri ïa u Bah Metbah Lyngdoh bad Bah Lahkmen Rymbui.
Haba u Bah Metbah Lyngdoh bad u Bah Lahkmen Rymbui ki la rung kum ki Myntri kim shym la lah ban kren ïa ki Myntri na ka NPP kaba la lamkhmat ïa ka Sorkar namar kane ka seng ka la batbor halade ïa ki kam pynroi ha ki konstitwensi kiba dei jong ki MLA ka UDP haduh ba kine ki phra ngut ki MLA ki la rung sha ka BJP bad lai ngut ki la rung sha ka NPP.
