Shillong, Naiwieng 01
U kyrtong ka Congress na ka bynta ka ilekshon shiteng samoi sha ka Shillong Lok Sabha, u Bah Vincent H. Pala u la ong ba wat tang kawei ruh ka shuki ha Parliament ka long kaba kongsan ban khanglad ïa ka Sorkar BJP ban pyndonkam ïa ka ‘FCRA Bill’ ban knieh ïa ki shlem treikam ba pynïaid da ki Khristan.
U Bah Pala u la ong ba ka ilekshon shiteng samoi kam dei ka ilekshon hapoh ka thaiñ hynrei ka ilekshon jong ka ri ha kaba ka jingma ka ap ïa lawei jong ki Balang, ki skul bad ki ‘Hospital’.
“Ki mat ba kongsan ki long ha ka kyrdan jong ka ri namarba kane ka ilekshon ka dei na ka bynta ka nongbah Delhi. Ka mat ba hakhmat eh ka long kumno ngi lah ban ïada ïa ki briew jong ngi, khamtam ki Khristan kiba don ki skul – Presbyterian ne Katholik – ki Hospital bad ki Ïingmane – namarba kane ka Sorkar ka thmu ban wanrah ïa ka ‘FCRA Bill’ ban knieh ïa kine,” la ong u Bah Pala.
“Kum ka Congress ngi la don lypa ka mat ban khanglad ïa kane ka ‘Bill’. Ngi ïathuh sha ki briew ba lada ngi kwah ban ïada ïa ki Balang, ki ‘Hospital’, ki skul bad ki jinghikai bapher-bapher na ka bynta kiba ngi ïoh jingïarap na ki paralok Khristan na shabar, ka Congress ka dei ban jop,” u la ong.
U Bah Pala u la ong ba ka BJP ka la dep ban pyntreikam ïa ki aiñ pyrshah ka jingpynkylla niam ha ki 12 tylli ki Jylla, bad shisien ba shiteng na ki Jylla ki mynjur ïa ka, ka kylla long ka aiñ jong ka ri baroh kawei.
“Kata ka ‘Bill’ ka dei khamtam eh pyrshah ïa ki Phadar, ki Pastor, ki ‘Evangelist’ bad ki nongïarap ha kylleng ka ri India. Lada ki leit shano-shano, lada don ka jingujor, ki lah ban shah kem. Bun ki la shah kem. Tang ha une u snem ba la dep ruh, la kem palat 750 ngut ki nongïalap na ki jingngeit bapher-bapher,” u la ong.
“Kane ka ‘Bill’ ba pyrshah ïa ka jingkylla niam (anti-conversion) ne kaba ki khot ka ‘Freedom of Religion Bill’ – ha kawei ka liang ka khanglad ïa ngi ban ïalap, ha kawei pat ka liang ka thmu ban knieh noh ïa ki jingdon-jingem jong ngi. Kaei ka jinglaitluid kaba sah? Lada ngi don ka spah, ka roi ka par bad ka jingkiew shaphrang hynrei ngim don ïa ka jinglaitluid, nga tharai ba kam don dor eiei,” la ong u Bah Pala.
“Baroh ngi ki Khristan ha India naduh ba ngi ïoh ïa ka jinglaitluid, ngi la long kiba laitluid bad ngi sngew shngaiñ, hynrei mynta ngi tieng ïa kiba don ha ka bor. Kumta ngi kum ka liang pyrshah ngi hap ban ïatylli lang kawei. Wat tang kawei ka shuki ruh ka long kaba kongsan bha, teng-teng ka long kaba eh bha ban ïoh wat tang kawei ruh ka shuki ha Parliament. Lada ki briew ki sngewthuh, ki dei ban kyrshan ïa ka Congress ban ïada ïa ka hok jong ki rit paid, ka hok jong ki Khristan bad ka hok jong kiba bun kiwei pat,” u la ong.
U la ong ruh ba lada knieh noh ïa ki shlem treikam ba la tei da ka jingïarap nabar ri, ki jinglut kin nang bun.
“Kum ki skul, khamtam ki skul bad ki ‘Hospital’, ngi ïoh jingïarap na shabar. Lada ïa kine la knieh bad pynïaid noh da kiwei, ka jinglut kan long ar ne lai shah, ym kum haba pynïaid da ki Khristan. Ki briew ki dei ban sngewthuh, kam dei tang shaphang ka jingshah knieh bad pynïaid da kiwei, hynrei lada pynïaid da kiwei, ka jingpynlut kan long kaba heh bad ki briew jong ngi kin ym lah ïa kane. Lada ngi kum ki Khristan nongpynïaid ngi duh noh ïa kine ki jingdon-jingem, ngi duh noh ïa kata ka kyrdan,” la ong u Bah Pala.
Halor kaei kaba u la leh kum u MP barim, u Bah Pala u la ong, “Ha ka jingshisha, ngam dei u MP, nga dei tang u MP barim, hynrei nga la leit sha Delhi bad nga la ïakynduh hi dalade ïa u Rahul Gandhi, nga la ïakynduh ïa u Kharge, u Venugopal. Naduh kata ka por, ha Parliament ki la pyrshah, ki briew jong ngi ki don hangtei. Ha nga shimet, ngam kwah tang ban shu phah jingthoh khlem da leh eiei, nga la ïakynduh hi dalade ïa ki dkhot.”
U la ong ba ka Congress bad ka Balang ki la dep ban shim ïa ka sienjam ban ïatreilang.
“Ka Congress ka la leh la ka kamram na ka liang jong ka Balang, ka Catholic Bishops Conference ka la thoh. Nga tharai ba kaei-kaei kaba ki la thoh ka la biang. Ngi la shong kum ka kynhun bad ngi la pyrkhat bha ïa ka. Ngim donkam ban pynbun ïa ki shithi. Nga ïohi teng-teng hapoh ka ïingbishar haba ki don bun palat ki shithi, uwei u ong da kumwei, uwei un ong da kumwei pat, kin ym sngap bad ong ba ka ïatyngkhuh kawei hapdeng kawei pat ka kynhun lane kawei ka seng bad kawei pat ka seng. Na ka liang ki Khristan khamtam ki Katholik, ngi don ka ‘Bishops Conference’, kiwei pat ki niam ruh ki la thoh, kumta kata hi ka la biang. Na ka liang ka Congress ruh ngi la pynpaw ka jingsngewkhia. Dei kumta ba nga ïeng ha ka Congress,” u la ong.
