Shillong, Naiwieng 03
U Myntri Rangbah ka Jylla, u Conrad K. Sangma u la ong ba ka jingbei tyngka mynta ha ki khynnah naduh ka rta ba dang lung ka dei ka jingbei tyngka ban saiñdur ïa ki nongïalam ka India lashai la shisngi.
U Conrad u la ong ïa kane ha ka ‘Advancing the Care Economy through Early Childhood Development Fellowship’ kaba long ha Lariti, Mawkasiang.
“Da kaba bei tyngka mynta, ngin tei ïa ka bor briew kaba donkam ban ïalam ïa ka ri hapoh jong u snem 2047,” la ong u Conrad.
U la ong ruh ba kane ka prokram ka kdew ïa ka sienjam kaba kongsan ban kyntiew ïa ka ïoh ka kot kaba kitkhlieh jong ka Meghalaya lyngba ka ‘Early Childhood Development Fellowship’, ka ban wanrah lang ïa ki samla ‘Fellow’, ki nongtrei ‘Anganwadi’ bad ki shlem treikam jong ka imlang-sahlang.
“Ka thong ba hakhmat eh jong ka ‘ECD Mission’ ka long ban pynbha ïa ki jingim bad ban wanrah ïa ka jingmanbha kaba neh ha ki nongshong shnong,” u la ong, da kaba bynrap ba ka projek ka long kum ka jingbei tyngka kaba kongsan ha ka bor briew ban pynkhreh ïa ki khynnah na ka bynta ka thong jong ka ‘Viksit Bharat’ ha u snem 2047.
U Conrad u la kdew ruh ïa saw tylli ki nongrim na ka bynta ka jingjop jong ka prokram.
Kaba nyngkong ka dei ka jingïatreilang, ha ryngkat ka jinglong nongïalam kaba treikam ryngkat-ryngkat bad ki nongtrei ‘Anganwadi’ lem bad ki ‘ECD Fellow’, ban pynroi ïa ka kolshor ha kaba kano-kano ka kam kan long kaba kongsan na ka bynta baroh ki dkhot jong ka kynhun.
Kaba ar ka dei ka jinglong trai, kaba dawa na ki nongtrei ban shimkhia bad ban khmih ruh ym tang ïa ki jingdonkam ba kongsan – kumjuh ym ban shu bud tang ïa ki hukum.
Kaba lai ka dei ka jingïadon bynta lang jong ki kmie ki kpa, da kaba pynleit jingmut halor kumno ki kmie ki kpa ki pynlut ïa ka por bad ki khun ki kti – kaba ktah beit-beit ïa ka jingroi jong ki khun hadien-habud.
Kaba saw ka long ka jingïaibteng, lyngba ka jingïadon bynta ha ki kyrdan ba ha khlieh duh kaba ïaineh ban pyntikna ïa ka jingkyrshan ha ka liang ka jingpynïaid kam bad ka pisa-tyngka.
U la pyntip ba kane ka prokram ka la ïoh ïa ka jingithuh, jingkyrshan na ki kynhun bapher-bapher kum ka ‘Asian Development Bank’, tnad pla tyngka ka Sorkar India, bad na u Myntri Rangbahduh kumjuh. U la ban jur halor ka jingdonkam ïa ka jingpeit bniah kaba man ka por ïa ka prokram ban pynneh ha ka jingpyntyllun ïa ki kam ki jam.
Haba pynkut ïa ka jingkren jong u, u la kitbok kitrwiang ïa ki ‘ECD Fellow’ ba kin nang kiew shaphrang ha ki kam ki jam jong ki.
Ha kane ka prokram la wan ban ïashim bynta da u Sampath Kumar, Additional Chief Secretary, Lt. Col. Vikram Singh Bhati, Director, National Council for Vocational Education and Training, Dinesh Arora, Principal Health Specialist, Human and Social Development Sector Office, Asian Development Bank, ki heh ophisar ka tnad Social Welfare, koit ka khiah, pule-puthi, bad ka tnad Community & Rural Development, nongtrei ‘Anganwadi’, ‘ECD Fellow’, dkhot jong ki SHG bad ki kynhun na ki shong ki thaw, ki kmie ki kpa bad ki nongsumar-sukher.
Ka ‘ECD Fellowship Programme’ mynta ka la pur sha baroh 12 tylli ki distrik, ha kaba la pynïadon bynta lang ïa 1,606 ngut ki khun samla, kynthup ïa 144 ngut ki ‘Fellow’ na ka ‘Pilot Phase’ bad 1,462 ngut ki ‘Fellow’ hapoh ka ‘Phase-1’, ban pynkhlaiñ ïa ka jingkyrshan ïa ki khynnah rit ha la ki jong ki shnong ki thaw.
Shuh shuh la ai ïa ka ‘Community Fund’ kaba kot sha ka T.39.50 klur sha 5,064 tylli ki SHG, kaba ai jingmyntoi ïa 40,513 tylli ki longïing, kum shi bynta ban pynkhlaiñ ïa ka bynta jong ki shlem treikam ka imlang-sahlang ba la ïalam da ki kynthei ha ka bha ka miat jong ka longïing bad ka roi ka par ha ka thaiñ.
