Shillong, Naiwieng 03
U MLA ka North Shillong u Bah Adelbert Nongrum ha ka sngi Nyngkong jong ka taïew, u la aiti ïa ka kali ‘Hearse Van’ sha ka Seng Khasi Kmie.
Ïa kane ka kali u Bah Adelbert u la ai lyngba ka skhim CMSDF jong u snem 2023-24 bad 2024-25, ha ka mang pisa kaba 13,77,089 tyngka.
Haba kren ha kane ka sngi, u Bah Adelbert u la ong “Ngi sah ha ka jinglyngngoh ba kumno ka mar ka her sha suiñ, ka nar ka per ha duriaw, ngi ai jingïaroh ïa U Blei”.
U la ong “Ka dei ban don ka jingmut ba ïa kiba la leit noh ngi dang bteng ban shakri ïa ki, katno tam ïa ngi kiba dang im ha kane ka sla khyndew. Ka don ka jingpynkynmaw na ka ktien U Blei, ba ka jingïap kam dei ka jingkut hynrei ka jingsdang jong ka jingsuk.”
U la ai khublei ïa ki nongïalam ba rangbah jong ka Seng Khasi Kmie, kiba la shim ïa kane ka jingpyrkhat namar ka jingjia ka rai hap ban pynkylla. Kadei ka jingsarong ïa baroh ba mynta ngi la ïoh ban pyllait ïa kane ka kali. Kane ka sngi kan sah jingkynmaw bad kane ka kali kan ai ïa ka jingshakri ïa ki longïing ki longsem.
U la ong ka jingkhot ka long ym na ka bynta ka nam ka burom, hynrei ban pyndep hok ïa ka kamram, ka deiti bad ka jingkitkhlieh.
U la ong ruh ba namar ka nongrim, bunsien u long marwei hynrei u dang lah bad un dang bteng namar ka nongrim. U la ong ka jingshakri kaba shisha kadei lyngba ka jingieid, ka jingsngewlem bad ka jingburom.
Ha kane ka sngi aiti ïa katei ka kali, la ïadonlang naduh u President u Bah O. Pyngrope, Vice President Bah P.D Nongrum, Bah Skor Jala, Bah Rangpher Rynjah, Bah Wallamphang Roy, ki longkmie ki longkpa bad ki khun samla ruh kumjuh.
