Shillong, Naiwieng 03
Ka United Democratic Party (UDP) ha ka sngi Ba-ar ka la pynkut noh ïa ka jingïadei kaba la jan dap lai snem bad ka Sorkar MDA-II ba la ïalam da u Conrad K Sangma, da kaba rai ban weng noh ïa ka jingkyrshan.
Ïa kane ka rai la shim ha ka jingïalang jong ka Central Executive Com-mittee (CEC) ka UDP kata hadien ba u Bah Metbah Lyngdoh, Presi-dent ka UDP u la iehnoh kam kum u Myntri Sorkar ha ka 31 tarik Risaw.
U Bah Titosstarwell Chyne uba long u General Secretary jong ka UDP u la ong, u Bah Metbah u la pyntip sha ka CEC halor ka jingiehnoh kam jong u kum u Myntri Sorkar ha ka jingïalang kaba la long ha ka sngi Ba-ar.
“U President u la pyntip sha ka CEC ba u la iehnoh ïa ka shuki Myntri Sorkar bad u la aiti ïa ka shithi iehnoh kam jong u sha u Myntri Rangbah ka Jylla ha ka sngi Saitjaiñ,” ong u Bah Titos.
“Shisien ba u President bad MLA ba marwei, kum u Myntri, u la iehnoh kam, ka CEC ka sngew ba kan bha ba ngin weng noh ïa lade na ka Sorkar,” u la ong.
Shuh shuh u Bah Titos u la ong, ka CEC ka la kyntu ruh ïa u Bah Metbah ba un weng noh ïa ka jingkyrshan ka party ïa ka Sorkar, kaba ka UDP ka la kyrshan ïa ka MDA naduh u snem 2023 hadien ka jingkhot u Myntri Rangbah ka Jylla.
U la kyntait ba ka don ka jingpynbor ha lyndet jong ka jingiehnoh kam u Bah Metbah.
“Kam shym la don kano-kano ka jingpynbor. U President, da ka mon jong u hi bad hadien ba u la ïamir jingmut bad ki nongïalam ka party, u la shim ïa ka rai ban iehkam noh kum u Myntri Sorkar ha ka sngi Saitjaiñ ba la dep,” u la ong.
U Bah Titos u la ong ba ka UDP kaba don mynshwa 12 ngut ki MLA ha ka Sorkar synroplang, mynta ka la don sa tang uwei, bad kam ïohi ïa ka nongrim ban bteng ban don bynta ha ka Sorkar.
“Wat ka NPP marwei ka don 36 ngut ki MLA, bad da ka jingkyrshan jong ki 11 ngut ki MLA bad ka HSPDP, ki la don lypa ïa ka Number ba biang ban bteng ban ïalam ïa ka Sorkar,” u la ong.
U la ong ba ka party mynta kan pynleit jingmut ban nang pynkhlaiñ ïa ka khamtam ha ki konstitwensi ba kam don MLA ne MDC.
“Kane kan ai por ïa u President jong ngi, uba dei u MLA marwei, ban pynbeit thymmai bad pynkhlaiñ ïa ka party,” u la ong bad bynrap ba kum ka party ka bym don shuh ha ka Sorkar, ka UDP kan long laitluid ban rah ïa ki mat jingeh jong ki paidbah khlem ka jingshah teh shah khum ba don ha ka Sorkar, hynrei kan leh halor ki nongrim ym tang ban kdew kti ïa ka Sorkar.
