Shillong, Naiwieng 04
U Myntri Rangbah ka Jylla u Conrad K. Sangma u la pyntip ba ka Sorkar ka la pynkhreh ban rah noh ïa ka Secretariat kaba thymmai sha New Shillong kaba la buh thong ha u bnai Naiwieng 2027, khnang ban pyllait shuh shuh ïa ka jingkhapngiah ïa ka sor Shillong kaba mynta.
Ïa kine ki kyntien u Conrad u la pynpaw mynta ka sngi haba u la plie ïa ki ar tylli ki jaka ïeng kali kiba heh kata ka District School Education Office-Cum-Multilevel Car Park ha Mawkhar bad ka Fully Mechanised Car Park ha Motphran kaba thmu ban pynduna ïa ka jingdheng kali ha nongbah Shillong. Ha kane ka sngi la ïadonlang u Symbud Myntri Rangbah ka Jylla u Bah Sniawbhalang Dhar.
Ïa kine ki jaka ïeng kali la tei hapoh ka Shillong Smart City Mission ha ka jinglut kaba 38.92 klur tyngka, kine ki ar tylli ki jaka kin ai jaka ïeng kali kaba la pynbeit ryntih na ka bynta 200 tylli ki kali ha ki ar tylli ki jaka ba khapngiah tam ha ka nongbah.
Haba kren ha kane ka sngi, u Conrad u la ong ba ka jingdheng kali ka dang long ka jingeh kaba kongsan tam kaba la pynpaw da ki nongshong shnong bad ki nongjngohkai pyrthei kumjuh.
“Ka jingïaid kali ka dei ka mat kaba nyngkong eh ha Shillong, kaba la pynpaw ym tang da ki nongshong shnong hynrei da ki nongjngohkai pyrthei ruh. Ki Sorkar bad ki tnad kiba bun ki la pyrshang ban wad ïa ka lad ban weng ïa ka, hynrei ngi la sngewthuh ba ki sienjam kiba rit kum ka jingshna ïa ki surok kiba ïaid tang kawei ka lynti ne ka jingpynsangeh ïa ka jingpynïeng kali ha kawei ka jaka kam lah ban long ka lad kaba neh,” u la ong.
U la ong ba ka Sorkar ka la pule bniah ïa ka jingleit jingwan haduh palat 18 bnai da kaba pyndonkam da ki drone, ki dur satellite bad ka jingkheiñ ïa ki kali ban sngewthuh ïa ka daw tynrai.
“Kawei na ki jinglap ba kongsan ka long ba katba ngi dang thaw ïa ki jaka bym dei ban ïeng kali, ngi khlem thaw ïa ki jaka ïeng kali. Lada phi kwah ban khanglad ïa u briew ban ïeng kali shawei pat, phi hap ban ailad ïa uta u briew ban ïeng kali shawei pat,” u la ong.
U Myntri Rangbah ka Jylla u la ong ba ka jingpynïeng kali hajan ka Additional Secretariat ka dei ka sien kaba nyngkong eh kaba kum kane, ha kaba ka Mawkhar bad ka Motphran ka dei ka bynta kaba ar. Shuh shuh u la ong ba u Myntri ka tnad surok ka Sorkar Pdeng u Nitin Gadkari u la sngewtynnad ïa ka jingpyntreikam ha Shillong.
“U la sngew phylla bad sngew lyngngoh ban ïohi ïa kata ka jaka ïeng kali ha Shillong. U la kylli ïa nga mano ba shna ïa kane bad u la ong ïa ki ophisar jong u – to buh jingthoh, kane ka dei kaei kaei kaba dei ban pyni nuksa ha kylleng ki jaka lum jong ka ri. Kata ka dei ka jait jingpynwandur kaba ngi la wanrah,” la ong u Conrad.
U la ong ba hapoh ka State Parking Policy, ka Sorkar kan ai haduh 1 lak tyngka sha ki riew shimet ne ki kynhun kiba don jaka ban pynroi ïa ki jaka ïeng kali.
“Ka jinglong trai bad ka jingpynïaid kan sah bad ka imlang sahlang. Ka dei ka jingïatreilang kaba pynshong nongrim ha ka imlang sahlang kaba ai jingshakri bad ai kam ruh ïa ki samla jong ngi,” u la ong.
U Conrad u la ong ba ka Administrative City kaba thymmai bad ka jingpynkynriah ïa ka Secretariat hapoh u bnai Nailur lane Naiwieng jong u snem ban wan, kan nang pynduna shuh shuh ïa ka jingkhapngiah ha ka nongbah.
Kane ka Secretariat kaba thymmai ka la ïaid shaid shaid ban tei ha Umsawli kaba hap ha shnong Mawpat kaba don mar pyrshah ïa ka Mawtawar.
