Shillong, Naiwieng 04
U Bah Sanbor Shullai uba dei u Nongïalam bad MLA ka BJP ha ka sngi Balang u la ong, ka BJP kala shah leh lyndet ha ka jingpynkylla ba dang shen ïa ka kynhun Myntri bad ba ka NPP ka khlem ïasyllok bad ka paralok kaba wan ba-ar ha ka jingbun paid.
Ha ka kyrwoh khubor, u Bah Sanbor uba dei ruh u Myntri Sorkar u la ong, ka BJP kaba don 10 ngut ki MLA, ka dei hok ban ïoh shuh ka shuki Myntri, ka jingdawa kaba la dep ban pynsngew ha u Myntri Rangbah hadien ka jingiehnohkam u President ka UDP Bah Metbah Lyngdoh.
U Bah Sanbor u la ong, ka BJP kam don jingpyrshah ïa kino-kino ki MLA ka NPP ba shah thung kum ki Myntri, hynrei la dei ban burom lang ïa ka BJP kum ka party kaba wan ba-ar ha ka jingbun paid.
“Ka BJP ka ju ïeng beit bad ka NPP wat ha ki por ba jynjar ha u snem 2023 haba baroh ki seng saiñpyrthei ki la kwah ban thaw ïa ka Sorkar synrop ba khlem ka NPP,” u la ong. U ong ba katba ka Sorkar MDA ka ïoh ïa baroh ki jingïarap bad jingkyrshan na ka BJP na Delhi, ka jingbym ñiewkor ïa ki MLA ka BJP da ki nongïalam ka NPP kam dei ka dak kaba bha ïa ka jingïatreilang.
Shuh shuh u Bah Sanbor u la ïathuh ba ki MLA ka BJP ha ka sngi Balang kila ïakynduh ïa u Rajiv Babbar uba dei u nongkhmih bad nongpeit ka thaiñ shatei lam-mihngi bad pyntip ha u shaphang ka jinglong jingman ka saiñpyrthei mynta bad kumno ba ka BJP kala shah leh lyndet ha ka jingpynkylla ïa ka kynhun Myntri bad ka jingsam bhah kam. U ïathuh ba ïa kane ka kam yn sa rah ïakren bad ki nongïalam ha Delhi shuwa ban shim ïa kano-kano ka rai.
U Bah Sanbor u la ïathuh ba u la dep ïakynduh ïa u Myntri Rangbah bad ïa baroh arngut ki Symbud Myntri Rangbah halor ka jingbthah ka Sorkar bad kyrpad ban pynlong ïa ka jingïalang bad baroh ki MLA ka BJP ha kaban pynbeit ïa kane ka kam da ka jingïasngewthuh jingmut.
