Shillong, Naiwieng 04
U Myntri Rangbah ka Jylla, u Conrad K. Sangma ha ka Sngi Balang u la kyntait ïa ka jingkynnoh ba ka don ka jingkhwai ïa ki MLA kumba la kynnoh da u Nongïalam ka Liang Pyrshah, u Dr. Mukul Sangma. Halor ki jingkynnoh, u Conrad u la ong ba ka jingpynïasoh jong ki MLA ka UDP sha ka BJP bad NPP ka dei ka rai shimet jong ki hi.
“Ha kane ka jinglong-jingman kaba mynta, ki MLA na ka UDP ki la rai ban pynïasoh bad ka BJP, bad 3 na ki 4 ngut ki la rai ban pynïasoh sha ka NPP. Ka dei ka rai kaba la shim ha ka kyrdan jong ki bad la shim ïa ki rai khlem kano-kano ka jingpynbor na ka liang jong ngi,” u la ong.
U Conrad u la ong ba watla ka dei ka jingkylla kaba manbha na ka bynta ka NPP, hynrei ym shym la pynbor eiei.
“Ngi sngewkmen ba ki la ïasoh bad ngi bad kum ka seng saiñpyrthei ka long ka jingkyrmen kaba manbha na ka bynta jong ngi hynrei kam shym la don ha kano-kano ka por, kano-kano ka jingpynbor ne kano-kano ka jingpynkohnguh kaba la hap ban leh ban pynbor ïa ki ban ïasoh bad ngi – kam shym la long satia kumta,” u la ong.
“Ki la pynïasoh da ka mon sngewbha bad da ka jingkmen sha ka NPP,” u la bynrap.
