Shillong, Naiwieng 04
U President ka BJP ha Meghalaya Rikman G Momin u la ong, ka party ka pdiang ïa ka rai u Myntri Rangbah Conrad K. Sangma halor ka jingpynkylla ïa ka Kynhun Myntri, hynrei ka party kan dang ban ïakren halor ka jingpan shuh shuh ïa ka shuki Myntri.
Kane ka jingpynkylla ïa ka kynhun Myntri kala mih da ka jingiehnohkam u President ka UDP Bah Metbah Lyngdoh, kaba lam sha ka jingpynrung ïa u Bah Paul Lyngdoh, MLA ka West Shillong, uba la wanphai pat sha ka kynhun Myntri hadien ka jingïasoh bad ka NPP ha ryngkat bad arngut kiwei pat ki MLA ka UDP.
Haba kylli la ka BJP kan dawa kham bun ki shuki Myntri ha ka Sorkar MDA-II, u Rikman haba ïakren bad ki nongthoh khubor ha ka sngi Balang u la ong, “Ka biang beit, ngi la pdiang ïa kaei kaba leh da u Myntri Rangbah. Tad haduh mynta ngi khlem pat ïakynduh bad la ki jong ki MLA. Hadien ba ïakynduh ïa ki, ngan sa lah ban batai sha phi”.
Haba kylli la ka party kam dom halor ka jingbym ïoh shuh ki shuki Myntri, u la ong, “Kane ka kam kan dang ïaid. Ngin sa kylli na u Myntri Rangbah. Ngin sa ïakren bad u”.
U la pynpaw ba ka kam ban dawa kham bun ki shuki Myntri ka dei ka kam ka ban sa ïakren hapoh ïing. “Ïa kane hi ngin sa ïakren bad u CM,” u la ong.
Haba kyntait ïa ki khubor ba ki MLA ba dang shu rung thymmai kila pynpaw ïa ka jingbym sngewtynnad bad dawa ïa ka jingtuklar jong u bad ki nongïalam na Delhi, u Rikman u la ong ba kam pat don satia ka jingïalang haduh mynta.
