Shillong, Naiwieng 04
Kum shi ban pynshlur ïa ki samla pule Khasi kiba sah ha Barak Valley, Assam, ka Khasi Students’ Union (KSU) Barak Valley Circle ha ka 29 tarik u Risaw 2026 ka la pynlong ïa ka jingsam Award sha ki 23 ngut ki samla pule kiba lah ban ïoh 70% shaneng ha ka kyrdan pule klas 10 bad klas 12 kynthup kiwei dei ki kyrdan pule.
Ha kane ka jingïalang ba la long ha Gandhi Bhawan, Silchar ka KSU ka la pyntian smai ruh ïa ki nongïalam ba thymmai jong ka KSU Barak Valley Circle ba kynthup ïa u samla Manar Shylla kum u President, u samla Horland Suchiang kum u Vice-President, u samla Solomon Lyngdoh kum u General Secretary, u samla Chaimon Sumer kum u Asst-Secretary, u Samla Sander Dhar kum Cultural Secretary, samla Denish Khonglah kum Organizing Secretary, samla Anothony Lamin kum Education Secretary, samla Henry Buam kum Publicity Secretary, samla Debison Dkhar kum Finance Secretary, samla Banshan Sutnga kum Sports Secretary bad samla Walton Rymbai kum u Adviser ka Circle.
Na ka Central Executive Council jong ka Khasi Students’ Union la leit ban ïashim bynta kum u kongsan da u samla Pynshai Rani (Asst General Secretary ka KSU-CEC) ha ka jingsynran lang ki nongïalam ka KSU East bad West Jaiñtia Hills District Unit.
Haba kane ka jingïalang ki samla Khasi-Jaiñtia kiba sah ha katei ka thaiñ ki pyni ïa ka jingieit bad burom jong ki ïa la ka riam ka beit tynrai, ktien ka thylliej, ka rwai ka shad halor rynsan da ki riam ki beit Khasi nylla bad pynpaw ïa ka jingriewspah ka jaidbynriew ïa ka kolshor u mynbarim.
