Shillong, Naiwieng 05
Ka ophisar IAS ba la shongthait Kong Ripnar Lyngdoh ka la bam smai kum ka State Chief Information Commissioner (CIC) ka Meghalaya ha ka sngi Palei ban pyndap ïa ka shuki ba thylli hapoh ka Right to Information Act, 2005.
La pynbam smai ïa ka Kong Ripnar da u Lat ka Jylla CH Vijayashankar hapoh ka Lok Bhavan Shillong.
Kiba la ïadon ban sakhi ki kynthup ïa u Chief Secretary ka Jylla Shakil P Ahammed, Additional Chief Secretary sha u Lat u HC Chaudhary, ki heh ophisar Sorkar, bad kiba ha ïing ha sem ka Kong Ripnar Lyngdoh.
Katkum ka jingpynbna ba la pynmih da ka tnad Personnel and Administrative Reforms (A) ka Kong Ripnar kan shakri ar snem naduh ka sngi ba shimti ïa ka kam lane haduh ba kan da dap 65 snem ka rta.
Ka samoi treikam bad ka tulop kin ïaid katkum ka Right to Information Rules, 2019.
Ka Kong Ripnar Lyngdoh kan khlieh ïa ka State Information Commission bad kan pyntreikam ïa ka bor katkum ka RTI Act, 2005.
