Shillong, Naiwieng 05
U MDC jong ka Laban Constituency u Bah Ricky Shullai u la ong ba ka Executive Committee (EC) jong ka Khasi Hills Autonomous District Council (KHADC) ka la ïaid lait na u kum u MDC ka thaiñ, haba ïadei ka jingleit khang tala jong ka ïa ka jaka treikam ka kompeni ba pyntrei ïa ka projek Ropeway.
Haba kren sha ki nongthoh khubor ha ka sngi Palei u Bah Ricky u la ong ba ka jingmih ki jingkynnoh ba ka Joint Action Committee (JAC) ka leh politik, ka dei namar ba u Chief Executive Member (CEM) u la ïaidlait na u kum u MDC ka thaiñ, wat haba u la phah jingthoh sha u CEM haba ïadei ka jingsngewkhia ba u la pynpaw ïa ka jingpynjot ïa ki dieng na ka jingwan jong ka projek.
U la ong ba kum u MDC ka thaiñ, ha ka 24 tarik u Naitung 2026 u la phah jingthoh sha u CEM u Bah Winston Tony Lyngdoh ban ai jingmut ban khot ïakren lane ban leh ïa ka jingjurip lang ïa ka jaka haba wan ka kompeni ban leh ïa ka ‘Trading License’, hynrei kaba lyngngoh ka long ba ha ka sngi ba ka Council ka leit khang tala ïa ka jaka treikam katei ka kompeni, kam shym la pyntip ne ai jingthoh ïa u ban wan lang ha katei ka jaka.
U la ong ba ka jingmih ka jingkynnoh ba don ka jingshah khynñiat seng saiñ pyrthei ïa kane ka mat, ka dei namar ba u CEM u khlem khot lang ïa u MDC ka thaiñ, kumjuh ki Rangbah Shnong ha ka sngi ba ka Council ka leit ban khang tala ïa ka jingpyntrei jong ka kompeni.
U Bah Ricky u la ong ba ka dei ka kamram jong u CEM ba un khot ïa u kum u MDC ka thaiñ bad ki Rangbah Shnong ban ïadonlang ha kato ka sngi, hynrei kaei kaba paw ha ki lad pathai khubor ka long ba don tang ki dkhot jong ka Party ba la ïalam ïa ka EC, “Dei hangne keiñ ba ka sa i long seng saiñ pyrthei noh kane ka mat bad dei namar kane ba ki longkmie ruh ki la shah kynthup lang ba ki don liang ha ka seng saiñ pyrthei” u la ong.
“Nga sngew ba u CEM lehse um sngew donkam ban khot ïa nga, kam pher. Nga sngew ban ai khublei ïa ka EC kaba la shim ïa ka sienjam ban leit khang, hynrei ki don ki kyndon ki lynti bad haba ki khlem pyntip ïa nga ba ha jaka ba ngan don bynta lang ma nga kum u MDC ka thaiñ, u CEM, ki Rangbah Shnong, don pynban da ki dkhot jong ka party” la ong u Bah Ricky.
“Ban ong ba ka Joint Action Committee (JAC) ka leh politik ka long kaba bakla namar ba ka Kong Debora Marbaniang bad ki longkmie naduh mynshem snem ka la phah shithi sha nga bad ki la thoh shai, ba ki pyrshah ïa ka jingpom dieng, hynrei ym ban pyrshah ïa ka jingwan jong ka projek” u la ong ban pynpaw ka jingsngewkhia ba don kiba shim kabu ïa kane ka mat ban leh politik bad pyrkhat ïa ka jingmyntoi.
U la kyntu ïa ka Dorbar Pyllun ka Riat Laban ba kam dei ban shim ïa kane ban leh politik, da kaba kdew ba kane ka dei ka mat kaba kongsan bad kaba donkam ban ïapynbeit bad kyntu ruh ïa kiwei ba kim dei ban shim kabu ïa kane ka kam tang ban myntoi ha ka kam seng saiñ pyrthei.
