Nongstoiñ, Naiwieng
Ka District Congress Committee (DCC) West Khasi Hills hapoh ka jingïalam u President Bah Eric Charles Kharsyntiew ha ka sngi Balang kala leit ban ïakynduh ïa ka Deputy Commissioner ka West Khasi Hills ha kaba ïadei bad ka kam jong ka DSC, ïa kaba kiba bun ki samla mynta haba ki thoh ïa ki eksam bad haba ki pynkhreh ïa ka jingwad kam ha ki kam Sorkar kim hun.
U Bah Eric Charles u la ong, ka DCC ka kyntu ïa ka Sorkar bad ki bor pynïaid District ban pynkhlaiñ ïa ki lad jingïada bad ban wanrah ïa ka jingpynshai ha ka rukom thungkam jong ka District Selection Committee (DSC), khnang ban ïada ïa ka hok jong ki samla wad kam bad ban pynthikna ba baroh ki kyrtong kiba biang ki ïoh ïa ka kabu kaba ïaryngkat.
U la ong ruh ba ka Committee ka ngeit skhem ba ka kam Sorkar ka dei ban ïoh lyngba ka jinglah, ka jingnang jingstad bad ka jingtrei shitom jong u kyrtong, khlem da shah liang ha ka saiñpyrthei, ka jingleh shiliang, ka jingshim pisa ne kino-kino ki jingleh bym hok.
U Bah Eric u la ong ruh namar ka jingdonkam ban pynneh ïa ka jingshaniah jong ki paidbah ha ka rukom thungkam, ha kane ka sngi ka DCC ka la aiti ïa ki phra tylli ki jingai jingmut sha ka DC ban shimkhia bad ban pyntreikam.
U la ong, kaba nyngkong ka dei halor ban pynkhlaiñ ïa ki lad jingïada bad ban pynthikna ba ki kot jingkylli kin ym lait shabar shwa ban sdang ka eksamin, ban buh ïa ka ‘strong room’ kaba shngaiñ, ban buh ïa ki kot jingkylli hapoh ka jingpeit jong ka tnad pulit.
Ban pyndait ïa ki kor CCTV ha baroh ki jaka eksamin bad ha ki jaka pynlong ïa ka ‘personal interview’, khnang ban don ka jingpeitngor bad ka jingkitkhlieh, ban pynlong ïa ka jingkhmih bniah ïa ki kyrtong shwa ban rung sha ka jaka thoh eksam, khnang ban khanglad ïa ka jingrah ïa ki tiar ba khang pyrshah. Ban don ki jaka ban talasi kiba kyrpang ïa ki shynrang bad kynthei.
U la ong ruh ba dei ban pyndonkam ïa ki OMR answer sheet ha ki eksamin kiba lah ban pyndonkam ïa kane ka rukom, khnang ban pynkhlaiñ ïa ka jingbishar kaba thikna bad kaba khlem shah liang.
Kumjuh ruh ban khang pyrshah ïa ka jingrung bad jingdon bynta jong ki briew kiba khlem bor ha ka por eksamin bad ‘personal interview’, ban pyni paidbah ïa ki ‘marks’ ba ki kyrtong kiba jop ki la ïoh, da kaba pynïakhlad shai ïa ki ‘marks’ jong ka ‘written examination’ bad ka ‘personal interview’.
U Bah Eric u la ong ruh ba ha ka jingïakynduh, ka DCC ka kyntu ïa ka DC bad ki bor ba dei peit ba kin shimkhia ïa kine ki jingai jingmut bad ban thaw ïa ki lad treikam kiba pynkhlaiñ ïa ka jingkitkhlieh ha manla ka kyrdan jong ka rukom thungkam.
U la ong ruh ba ka Committee ka pynpaw ba ki samla wad kam jong ka West Khasi Hills ki dei ban ïoh ïa ka kabu kaba hok ban ïoh kam Sorkar lyngba ka jinglah bad ka jingtrei shitom jong ki, ym lyngba ka jingïadei saiñpyrthei, ka bor pisa ne ka jingithuh briew.
Ha kaba ïadei bad ka jingjia ha kine ki bnai ba la lah, ba na ka liang jong u MLA ka Nongstoiñ u Bah Gabriel Wahlang u la leit ban ai ka FIR hapoh thanad halor ka jingshah kynnoh ïa ka kam staff nurse, u Bah Eric u la ong, ka DCC kala ïakren ruh bad ka DC bad kala kyrpad ba kum kine kiei-kiei kim dei ban jia shuh.
Shuh shuh u la ong ruh ba haba la pyrshang ban kylli hapoh thanad ba ki la register mukotduma ne em ïa kane ka bynta bad ka jubab ka long ba la register bad ka jingtohkit kala ïaid shakhmat.
“Na ka liang ka Congress ka shu kwah ban pynsngew ba haba la ïaid ïa ka kam bad la register ïa ka FIR, ka donkam ïa u paidbah ban tip la ka jingshah pharep ba shim ïa kata ka pisa ka long kaba shisha ne em lane dei bala ai pisa ruh ïa kita hi donkam ban leh tyngeh, donkam ban kut kane ka kam ym dei ban ai FIR tang ha sla hynrei ban pynpaw ba kata ka jingkynnoh jong ka VPP ka dei kaba shisha ne em, la kata ka jingai FIR jong u MLA ka dei kaba shisha ne em bad lada ka dei kaba shisha pynpaw noh ba ki paidbah kin tip bad khnang ba ka jingbha kan wan,” ong u Bah Eric.
