Shillong, Naiwieng 06
Ka Sorkar Jylla ka la kyntu ïa ka Sorkar Pdeng ban shimti noh ïa ka jaka ka ban hap shabar ka jingker sainar khappud bad ban siew ïa ka bai lutksan sha ki trai jaka, namarba haduh mynta, ka dang ap ïa ka jubab na ka Sorkar Pdeng.
U Symbud Myntri Rangbah ka Jylla ka tnad kam pohïing, u Bah Prestone Tynsong u la ong ïa kane ha ka Sngi Thohdieng haba jubab shaphang ka jingtei païa ha ki jaka khappud hadien ka jingïakynduh ba dang shen bad ki shipai BSF.
“Ki trai jaka kiba don ka jingsngewkhia, kaei kaba ki kwah na ka Sorkar India ka long, ha kum kine ki khep kiba la jia kumta, ai ba ka Sorkar India kan shimti bad ai ba kan siew ïa ka bai lutksan,” la ong u Bah Prestone.
“Ïa kane ka mat la pynsngew ruh sha ka Sorkar India, kumta ngi dang ap ïa ka jingmih na kata ka jingpynshai kaba ngi la ai sha ka Sorkar India, khamtam sha ka tnad kam pohïing ka Sorkar Pdeng,” u la bynrap.
U Bah Prestone u la pynshai ba ki trai jaka kim pyrshah ïa ka jingker sainar.
“Peit, ka jingker sainar ka long kaba suk bha, nga dei ban ong, naduh Ri-lum Garo haduh East Jaiñtia Hills, ki trai jaka, ki bor shnong, kim pyrshah, to ai ba ngan kren shai bha halor kane,” u la ong.
U la ong ba tang kawei ka jingsngewkhia ka long shaphang ka jaka kaba sah shabar jong ka jingker sainar.
“Tang kawei ka mat kaba ki trai jaka ki don ka jingsngewkhia ka dei halor ka jaka. Shisien ba la dep ka jingker sainar, ka jaka ka don shabar jong ka jingker sainar, namarkata, ka jaka kan sa kylla long hi kum ka ‘No Man’s Land’, kin ym lah wat ban leit rep ruh,” u la ong.
“Kumta, namarkata, ka kylla long ka jaka kaba shah iehnoh kumto,” u la bynrap.
Haba la kylli katno tylli ki jaka kiba kum kine ki don, u Bah Prestone u la ong, “Nga tharai ym duna ïa ka 45 km.”
