Shillong, Naiwieng 06
U Bah Titosstarwell Chyne uba dei u MDC ka UDP na Sohra Constituency u la ong ba ka Sorkar ka dei ban pynkhie im ïa ka projek Ropeway na Mawsynram sha Sohra kaba la jah noh ha ka por ba long Myntri Rangbah u Dr. Mukul Sangma ha u snem 2015-16.
Kane ka jingpynpaw u Bah Titos ka dei halor ka jingmih ka jingpyrshah ki nongshong shnong ïa ka Ropeway kaba don ha u Lum Shyllong.
U la ong baroh ïa ki kam pynroi ka long kaba donkam ban kyntiew ïa ka ïoh ïa ka kot ka Jylla hynrei kam dei kata ka kam pynroi ban ktah ïa ka mariang bad ïa ka im ka ïap jong ki paidbah.
U la pynkynmaw ba ha u snem 2015-16 ha ka por ba long Myntri Rangbah u Dr. Mukul Sangma ka la don ka jingtyrwa ban shna ïa ka project Ropeway na Mawsynram sha Sohra ïa kaba la pynrung ruh ha dorbar mangtyngka hynrei ym tip na kaei ka daw ba ka jah noh, kumta u la kyntu ïa ka Sorkar lada ka don ka lad dei ban shna biang sa kawei ka projek Ropeway na Mawsynram sha Sohra.
U la ong ba ka KHADC ka dei ban pynïeng ïa ka nongrim haba ka leit ban khang tala namar katkum ki kyndon ba kino-kino ki company ki wan treikam hapoh ka Sixth Schedule ki dei ban ïoh ïa ka laisen khaïi na KHADC.
Haba ïadei bad ka jingpyrshah ïa ka Ropeway u la ong ba kane baroh ka dei ha ka jingstad ki nongshong shnong ka Laban namar um kwah ban kren palat haba um pat tip ïa ka sdang bad ka kut.
