Shillong, Naiwieng 06
Ha ka janmiet jong ka sngi Thohdieng, u Deputy Commissionner (DC) ka East Khasi Hills District (EKHD), u Abhilash Baranwal, u la wan poi ha ka jaka shongïakhih ki longkmie na ka Joint Action Committee (JAC), ha u motdur u Kiang Nangbah, kiba pyrshah shna Ropeway Projek.
Ka jingïakhih da kaba shong kyllaiñ mungor ki longkmie ka JAC ha motdur u Kiang Nangbah, ka la sdang naduh ka shiteng sngi jong ka 06 tarik Naiwieng 2026, bad ki dang bteng ban sah miet ha katei jaka, tad haduh ba ka Sorkar kan weng bad pynkynriah noh ïa ka Ropeway Projek na u Lum Shyllong.
Haba kren sha ki lad pathai khubor u Abhilash Baranwal u la ong “Nga wan ha kane ka jaka, ban kyntu ïa ki longkmie jong ka JAC, ba kin pynkut noh ïa ka jingshong jingïakhih bad leit phai noh sha la ïing”.
U la ong ba namar bun na ki longkmie ki la tymmen, ka jingsah miet ha surok ka lah ban ktah ïa ka koit ka khiah jong ki. Kumta, u la wan hi dalade, ban kyrpad ïa ki ba kin sngewbha ban leit phai noh, hynrei ka jingïakren ban pynsngewthuh ïa ki ka dang ïaid.
Haba kylli, la ki longkmie ki la mynjur ban leit phai ne em, u DC u la ong “Haduh kane ka por, ki dang pynpaw ba ki kwah ban bteng ïa ka jingshong ïakhih.”
U la bynrap ba ki Magistrate bad ki pulit kin dang peit ïa ka jinglong jingman bad ïakren bad ki hapdeng ka jingsah miet jong ki ha kane ka jaka.
“Lada ki longkmie ki pynthut bad ïaid lait na ki kyndon ba la buh katkum ka jingbthah ban pynlong jingïakhih, ki bor district kin sa peit bad shim ïa ki sienjam kiba dei ban shim. Hynrei ka jingthmu jong nga ka long ban pynbeit lyngba ka jingïakren, khlem da poi sha ka jingïakynad bad ki longkmie,” la ong u DC.
Namarkata, u la kyntu ïa ki longkmie, ban pynsangeh noh ïa ka jingshong ïakhih da kaba shong kyllaiñ mungor bad ban leit phai sha la ki ïing.
